Lázzat Ibragımova: Tutynýshylyq nesıeni eki mınýtta rásimdep berý durys emes

<p>ALMATY. KAZINFORM — Kommertsııalyq bankter tutyný kredıtin berýdi belsendi túrde damytyp jatyr. Tutynýshylyq nesıeni eki mınýtta rásimdep beredi. Bul durys emes. Mundaı pikirdi qarjygerler kongresinde «Otbasy bankiniń» tóraǵasy Lázzat Ibragımova aıtty.</p>

«Qazir elde qarjy alaıaqtar kóbeıdi. Bizge kelgen nesıe alýshylardyń basym bóligi onlaın alaqtardyń qurbany bolǵandaryn aıtady. Sondyqtan, onlaın kredıt alýshylarǵa 24 saǵat nesıe rásimdemeı turý qajet degen usynysty qoldaımyn. Men túsinbeımin ne úshin tutynýshylyq nesıeni eki mınýtta rásimdep beredi. Bul durys emes. Mundaı jyldamdyqtyń maqsaty ne», — deıdi ol.

Aıtýynsha, ıpotekaǵa baspana alatyndarǵa da oılanýǵa ýaqyt berilýi kerek.

«Ekonomıst retinde aıtatynym, onlaın ıpotekany maquldaý úshin 20 mınýt jetkiliksiz. Kelisim shart jasaǵannan keıin adamǵa taǵy bir apta ýaqyt bergen jón. Óıtkeni, tutynýshy bul kelisimge qol qoıar aldynda 19 jylǵa qaryz alyp jatqanyn túsiný kerek. Osy ýaqyt aralyǵynda ol qarjy tóleýge múmkindigi bola ma, osyny oılanyp alady. Bul álemdik ekonomıkada oryn alyp otyrǵan másele», — deıdi Lázzat Ibragımova.

Onyń pikirinshe, qazir bıznes úlgilerdiń arasynda qaqtyǵys bar.

«Kommertsııalyq bankter tutyný kredıtin berýdi belsendi túrde damytyp jatyr. Klıent bireý ǵana. Orta tabysy bar qazaqstandyq. Tsıfrlandyrý, marketıng jáne jarnama sekildi túrli quraldarmen osy qazaqstandyqty tutyný kredıtin alýǵa tartady. Biz kelip: «Joq. Toqta. Aldymen qarajat jınaý kerek. Baspana alý jaıly oılaný kerek. Depozıt ash, jınaqta» deımiz», — deıdi bank basshysy.

Osyǵan deıin ol qazaqstandyqtardyń mıkroqarjy uıymdary aldyndaǵy qaryzy ıpoteka rásimdeýge kedergi keltiretinin aıtqan bolatyn.