Láılá Sultanqyzy FlyArystan-nyń ústinen aryz jazdy
«Men @flyarystan ústinen aryz jazdym. Keshki 21:50 shamasynda KC7326 reısimen Shymkentten Astanaǵa ushyp keldim. Ushaqtyń esigi ashylmaı, turyp ketken janymdaǵy jolaýshynyń abaısyzdyǵynan betime ústińgi sórede turǵan aýyr (qatty) zat, men otyrǵan jerge qulap, kózimniń tusyn jyryp, qabaǵym jaryldy», - dep jazdy Láılá Sultanqyzy Instagram-daǵy paraqshasynda.
Ol FlyArystan áýekompanııasy qaýipsizdik sharasyn saqtamaǵanan keıin osyndaı jaǵdaıǵa tap bolǵanyn, jaraqat alǵanyn aıtty.
«Bortserikter men áýekompanııanyń alǵashqy kómekke daıyn emes bolǵanyna qapa boldym. Ne dárisalǵysh, ne muz, ne qan toqtatyn zat, ne salfetka joq. Meniń ornymda kishkentaı bala nemese qart adam bolsa, basy jarylyp nemese qatty jaralansa, mıy shaıqalsa, kóp qan ketse jaǵdaı qıyn bolatyn edi. Jaýapsyzdyq qoı. Bortserikter ár jolaýshy minip-túskenshe adam densaýlyǵyna jaýapty bolýy kerek. Olar alǵashqy kómek kórsetýge mindetti», - deıdi telejúrgizýshi.
Óz kezeginde FlyArystan áýekompanııasy bolǵan jaıtqa qatysty túsinikteme berdi.
«Astana – Shymkent KS7326 reısi aıaqtalar tusta, ushaqtan shyǵýǵa daıyndyq kezinde, jolaýshylardyń biriniń tarapynan kelesi jolaýshyǵa kómek kórsetý týraly ótinish túskenin habarlaımyz. Bortserikter jolaýshyǵa maılyq pen sýyq qańyltyrly bótelkeni usyndy. Sodan keıin, protsedýraǵa sáıkes, bortta medıtsınalyq bilimi bar jolaýshylardy izdeý týraly habarlandy jáne áýe kemesiniń komandırine habar berip, dáriger shaqyrý suraldy», - dep túsindirdi áýe kompanııanyń baspasóz qyzmeti.
Sol mezette jolaýshylardyń arasynan medıtsınalyq bilimi bar adam tabylǵan.
«Ushaq baspaldaǵy jalǵanyp, qonýdan keıingi tıisti protsedýralaryn aıaqtaǵannan keıin bortserikter áýejaı qyzmetkerlerine bolǵan jaı týraly jedel habarlap, bilikti medıtsınalyq qyzmetkerlerdi surady. Alaıda, ushaqtan túsirý kezinde jolaýshy dárigerlerdi kútpesten borttan shyǵyp ketti», - delingen habarlamada.
Sondaı-aq resmı aqparatta bortta alǵashqy medıtsınalyq kómek qobdıshasynyń bolǵany aıtylǵan.
«Ushaqtyń bortynda belgilengen standarttarǵa sáıkes jabdyqtalǵan alǵashqy medıtsınalyq kómek qobdıshalarynyń úsh túri bar ekenin eske salǵymyz keledi. Atalǵan jolaýshyǵa qatysty bilikti medıtsınalyq qyzmetkerlerdi izdeý jáne shaqyrý boıynsha alǵashqy medıtsınalyq kómek kórsetildi», - degen jaýap aldyq.
FlyArystan málimetinshe, jolaýshy dárigerlerdi kútýden bas tartqan.
«Jolaýshy Láılá Sultanqyzynan shynaıy keshirim suraımyz jáne tezirek saýyǵyp ketýin tileımiz. FlyArystan borttaǵy qaýipsizdik erejelerin saqtaýdyń mańyzdylyǵyn eske salady. Óıtkeni bizdiń basty qundylyǵymyz – jolaýshylarymyzdyń qaýipsizdigi», - deıdi áýe kompanııadan.