Laýazymdy tulǵalarǵa jer zańnamasyn buzǵany úshin jaýapkershilik kúsheıedi
«Halyqty jeke aýladaǵy jaıylym jerlerimen qanaǵattandyrý maqsatynda 2022 jyly jergilikti atqarýshy organdar birneshe shara júrgizdi, irgeles jatqan bos jerlerdi eldi mekender jerine qosý arqyly shekaralary 421,2 myń gektarǵa keńeıtildi. Bos jatqan jerlerden 2,4 mıllıon gektar jergilikti turǵyndarǵa qaıta bólindi, 22,7 myń gektar aýyl sharýashylyǵy alqaptary jaıylymǵa aýystyryldy. 325,5 myń gektar halyqtyń jaıylymdarǵa qajettiligin qanaǵattandyrý úshin alyndy jáne 1,2 mıllıon gektar jer rezervke qoıyldy», - dedi E. Qarashókeev Úkimettiń búgingi otyrysynda.
Aýyl sharýashylyǵy mınıstrligi jerdi paıdalaný men qorǵaý jónindegi memlekettik baqylaýdy jetildirý jumystaryn jalǵastyrýda. Máselen, mınıstrliktiń bastamasymen jerdi paıdalaný men qorǵaýdy memlekettik baqylaý máseleleri boıynsha Ákimshilik quqyq buzýshylyq týraly kodekske ózgerister engizý jónindegi Zań jobasy ázirlendi. Ol QR Parlamenti Májilisiniń qaraýynda jáne bıylǵy 18 qańtarda ekinshi oqylymǵa shyǵarylady.
«Zań jobasy birqatar eleýli túzetýler engizýdi kózdeıdi: jergilikti atqarýshy organdardyń laýazymdy adamdarynyń jer zańnamasyn buzǵany úshin jaýapkershiligin kúsheıtý; menshiginde jaıylymdyq jáne shabyndyq alqaptary bar adamnyń eldi meken jerlerinde zańsyz shóp shabý jáne mal jaıý máselesi boıynsha jaýapkershilikterin belgileý jáne basqalary. Mınıstrlik osy túzetýlerdi jarty jylda qabyldaý úshin barynsha kúsh salýda», - dedi E. Qarashókeev.
Aıta keteıik, Qazaqstannyń 15 oblysynda mal jaıý úshin 8,9 mln gektar jer jetispeıdi. Bul kóbinese jeke qosalqy sharýashylyqtarda mal sanynyń aıtarlyqtaı ósýine baılanysty.
Ótken jyly paıdalanylmaı jatqan 5,2 mln gektar jer memleketke qaıtaryldy, 2023 jyldyń sońyna deıin taǵy 5 mln gektar jerge shara qoldanylady.
Sondaı-aq Qazaqstanda jer paıdalanýshylardyń nemquraılyǵynan 90 mln gektar aýmaq erozııaǵa ushyrady jáne onyń 29,3 mln gektary iske jaramsyz.