Laýazymdy sheneýnikterdiń otbasy múshelerine sheteldik shottardy ashýǵa tyıym salynady

NUR-SULTAN. QazAqparat – Offshorlyq ıýrısdıktsııalarǵa aqsha aýdarymdary bóliginde zańnama jetildiriledi. Bul týraly QR Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Jyl sońyna deıin shaǵyn jáne orta bıznes sýbektilerin jaldaý tólemderinen bosatý boıynsha jaldaý erejelerine ózgeris engizý jóninde birlesken jumys júrgizilýde. Respýblıkalyq jáne kommýnaldyq menshik obektileri boıynsha shaǵyn jáne orta bıznes sýbektilerimen tıisti qosymsha kelisimder jasasý josparlanýda. Kvazımemlekettik sektor da olardy basqarý organdarynyń shaǵyn jáne orta bıznesti jaldaý tólemderinen bosatý jóninde sheshim qabyldaýy qajet», - dedi mınıstr Úkimet otyrysynda.

Budan bólek ol «Kóleńkeli ekonomıkaǵa» qarsy kúres sharalary týraly aıtty.

«Kóleńkeli ekonomıkaǵa qarsy is-qımyl jónindegi jospar ózektendiriledi jáne offshorlyq ıýrısdıktsııalarǵa aqsha aýdarymdary bóliginde zańnama jetildiriledi», - dedi E. Jamaýbaev.

Mınıstrlik FATF usynymdaryn oryndaıdy, atap aıtqanda:

- memlekettik jáne kvazımemlekettik sektordyń laýazymdy tulǵalaryna jáne olardyń otbasy múshelerine sheteldik shottardy ashýǵa tyıym salýdy engizý;

- salyq organdarynyń kásipkerlik sýbektilerinen túpkilikti benefıtsıarlar týraly málimetterdi alý quqyǵyn zańnamamen bekitý.

«Ekonomıkalyq yntymaqtastyq jáne damý uıymy (EYDU) elderiniń salyq organdary arasynda aqparat almasý aıasynda QR rezıdentteriniń qarjylyq shottary týraly málimetterdi taldaý eskerilgen. Salyqtyq jáne kedendik ákimshilendirýdi tsıfrlandyrý boıynsha jumys jandandyryldy. Astana-1, Elektrondyq shot-faktýralar júıesi jáne Vırtýaldy qoıma iske qosyldy. Budan basqa, temeki jáne alkogol ónimderin tańbalaý pılottyq joba retinde júrgiziledi jáne onlaın-baqylaý kassalyq mashınalary (BKM) engizildi», - dedi mınıstr.

Onyń sózine qaraǵanda, júıelerdi ıntegratsııalaý esebinen QHR-men ımport boıynsha kedendik statıstıkanyń alshaqtyǵy tómendedi.