Laýazymyn asyra paıdalanǵan QTJ sheneýnigi 4 jylǵa sottaldy

<p>ASTANA. KAZINFORM - Laýazymyn asyra paıdalanǵan QTJ sheneýnigi 4 jyl 8 aıǵa sottaldy. Bul týraly Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov aıtty.</p>

«Astana qalasynyń qylmystyq isteri jónindegi mamandandyrylǵan aýdanaralyq soty «Qazaqstan temir joly» UK» AQ fılıaly – «Avtomattandyrý jáne tsıfrlandyrý dırektsııasy» dırektory S.Amrınǵa qatysty úkim shyǵardy. Ol óziniń jeke turǵyn úıiniń qurylys jumystarymen aınalysyp júrgen tanysyn jalǵan ınjener etip jumysqa ornalastyryp, bıligin asyra paıdalanyp, zańsyz jalaqy túrinde memleketke 21 mıllıon teńge zalal keltirgeni úshin kináli dep tanyldy», - dedi resmı ókil.

Onyń dereginshe, oǵan memlekettik qyzmette jáne kvazımemlekettik sektor sýbektilerinde laýazymdardy atqarý quqyǵynan ómir boıyna aıyra otyryp, 4 jyl 8 aıǵa bas bostandyǵynan aıyrý jazasy taǵaıyndaldy.

«Sot aktisi zańdy kúshine engen joq», - dedi Danııar Bıgaıdarov.