Latynǵa kóshýden qorqýdyń esh jóni joq - Asyly Osman

ASTANA. QazAqparat - Jańa qazaq álipbıinde 2 áripti bir-birine qosaqtaǵandy jón kórmeımin. Mundaı pikirdi búgin memlekettik tildiń latyn grafıkasyndaǵy álipbıiniń biryńǵaı standartyn engizý máselelerine arnalǵan dóńgelek ústel otyrysynda belgili qoǵam qaıratkeri, qazaq tiliniń janashyry Asyly Osman bildirdi, dep habarlaıdy QazAqparat.

«Árbir nárse árbir qoǵamǵa  laıyqty oı týyndatady. Dál qazir bizdiń qoǵamyzǵa  kerekti nárse  - qazaq álipbıin latyn álipbıimen tańbalaý. Osy turǵydan kelgende ótip jatqan jıyndar da, bári de jaqsy. Biraq halyqqa uǵyndyryp, túsindirý, nasıhattaý kemshin. Bireýi túsinip, bireýi burys túsinip jatyr. Bul jerde biz qazaqtyń tilin latynnyń tiline aýystyrmaımyz ǵoı. Qazaqtyń tiliniń  áýezdilgin, shuraılylyǵyn saqtaı otyryp, qazaq tilin latyn álipbıimen tańbalaý ǵana. Sol tańbalaýda qazaqtyń óziniń úni de, áýezi de sazy da saqtala bilýi kerek. Osy turǵydan kelgende qazaq tilin latyn álipbıimen tańdalaýdy jón kóremin, qoldaımyn», - dedi ol.

Onyń aıtýynsha, árbir tildiń ózindik erekshelikteri bar.  Latyn álipbıine kóshý barysynda sol erekshelikterdi saqtaı bilýimiz kerek. 

«Biraq, Qudaıdan jasyrmaǵandy adamnan da jasyrmaımyn. 25 tańba degenge aıtarym, eki áripti bir-birine qosaqtatqandy  jón kórmeımin. Basqasha belgilerdi qoıǵany jaqsy. Latyn áripimen qazaqtyń tilin tańbalaǵan kezde qazaq tiliniń baǵy ashylyp, sóziniń órisi keńeıedi. Qazaq sóziniń  ishki jan-dúnıesin, maǵynasyn  uǵyp, sol maǵynasyn bere alasyz. Mine, eń basty erekshelik osynda. Latynǵa kóshýden qorqýdyń esh jóni joq», - dedi Asyly Osman.