Latyn qarpine kóshý arqyly Qazaqstan álemge jaqynyraq bolady - Ahmetbekov
«Bizdiń jahandaný men aqparattyq tehnologııalar jedel damyp jatqan ǵasyrymyzda tildi jańǵyrtý máselesi elimizdiń básekege qabilettiligi men ınnovatsııalar deńgeıi, memlekettiń ınvestıtsııalarǵa tartymdylyǵy men ashyqtyǵy, adam kapıtalynyń damýy sııaqty strategııalyq máselelermen tikeleı baılanysty. Bizdiń oıymyzsha, latyn qarpine kóshý arqyly memleketimiz álemniń kóptegen elderine ashyǵyraq jáne jaqynyraq bolady, óıtkeni qazirgi zamanda memleketterdiń 75%-dan astamy latyn grafıkasyn qoldanady», - dep atap ótti J.Ahmetbekov.
Onyń aıtýynsha, qazirgi tańda álemde 6 túrki memleketi bar. Qazaqstan latyn qarpin qoldanatyn besinshi memleket bolady. Latynǵa kóshý Qazaqstannyń Ázerbaıjan, Túrkııa, Ózbekstan men Túrikmenistan sııaqty Orta Azııa jáne Kaspıı teńizi aımaǵyndaǵy memlekettermen odan ári jaqyndasýy men qarym-qatynastarynyń kúsheıýin, ıntegratsııa men kórshiles qarym-qatynastardyń kúsheıýin bildiredi.
«Meniń oıymsha, latyn qarpine kóshýdiń barlyq alǵysharttary bar. Bizde 100% jappaı saýattylyq, kúndelikti ómirde uıaly telefondy, ınternetti qoldaný barysynda árbir qazaqstandyq derlik is júzinde latynsha jazady jáne oqıdy. «Rýhanı jańǵyrý» baǵdarlamasy jaryqqa shyqqan boıda biz elimizdiń aımaqtaryna sapar shegip, óńir turǵyndarymen kóptegen kezdesýler ótkizip, qazaqstandyqtardyń atalǵan baǵdarlamaǵa qyzyǵýshylyq tanytqandyqtaryn jáne birinshi kezekte memlekettik tildiń latyn qarpine kóshý máselesine qoldaý bildirip otyrǵandyqtaryn kórdik», - dedi ol .
Jambyl Ahmetbekovtiń atap ótýinshe, otandastarymyzdyń basym kópshiligi Elbasyna qoldaý bildirýde jáne latyn qaripne kóshý úrdisin qajet dep esepteıdi.
«Kúni keshe ǵana parlamenttik tyńdaýda jańa qazaq álipbıimen tanysyp, biz - kommýnıster, partııalastarmen birlese onyń basymdylyqtary men múmkindikterin talqylap, usynylǵan latyn qarpiniń nusqasyn tolyq qoldaý týraly sheshimge keldik. Kommýnıstik halyq partııasy óz jumysynda jastarǵa, ásirese aýyldy eldi mekenderdegi jastarǵa erekshe kóńil bóledi», - dep atap ótti partııa hatshysy.
Onyń aıtýynsha, biz barlyq kúsh-jigerimizben qazaq tiliniń latyn qarpine kóshýin qoldap, onyń iske asyrylýyn qamtamasyz etýimiz qajet. Árıne, bul jerde eń negizgisi - barlyq qoǵamdy jumyldyrý.
«Latyn qarpine kóshý arqyly barlyq tyń múmkindikterge qol jetkizetinimizdi halyqqa túsindirýimiz kerek. Bul bizdiń ortalyqta jáne jergilikti jerlerdegi ortaq mindetimiz. Sondyqtan, men - Qazaqstan kommýnısteri atynan barlyq el azamattaryn jańa qazaq álipbıin engizý jónindegi talqylaýlarǵa belsendi qatysýǵa shaqyramyn», - dedi J. Ahmetbekov.