Latyn qarpine kóshken kezde ózge elderdiń tájirıbesin eskergen jón - sarapshy

ALMATY. QazAqparat - Búgin Almatyda Qazaqstan halqy Assambleıasynyń ǵylymı-sarapshylyq toby men Fılosofııa, saıasattaný jáne dintaný ınstıtýttarynyń ǵalymdary qazaq tiliniń latyn álipbıine kóshý máselesin talqylady, dep habarlaıdy QazAqparat.

QHA ǵylymı-sarapshylyq tobynyń tóraǵasy Muhtarbek Shaıkemelovtiń aıtýynsha, latyn álipbıine údemeli túrde kóshýge bolmaıdy.

«Biz latyn álipbıine ońtaıly kóshýdi jyldamdatýymyz kerek-aq. Bir jaǵynan ony údemeli etýdiń qajeti joq. Bizge deıin latyn qarpine kóshken elderdiń ozyq tájirıbesin eskergen jón. 2020 jyldyń 1 klasynan bastap kezeń-kezeńimen latyn álipbıin engizý bastalǵany abzal. Biraq bizde oǵan deıin áli ýaqyt bar. Sol ýaqytta sarapshylardyń kómegimen muǵalimderdi, ustazdardy oqytý kerek», - dedi Shaıkemelev.

Professor Aqan Bıjanovtyń aıtýynsha, latyn álipbıine kóshý tarıhı sheshim.

«Eń mańyzdysy, latyn jazýy ǵasyrlar boıy óz qunyn joǵaltpaı keledi. Álem turǵyndarynyń 80 paıyzdan astamy latyn qarpin paıdalanady. Álemdegi aqparattardyń 70 paıyzy latyn árpinde basylady. Álipbıdi ózgertý - tarıhı sheshim. Bul qoǵamymyzdyń jan-jaqty damýyna túrtki bolady dep senemin», - dedi Bıjanov.

Aıta keteıik, QR Prezıdenti Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasyn júzege asyrý aıasynda Parlamentte qazaq tiliniń latyn grafıkasyndaǵy álipbı jobasy usynylǵan bolatyn.