Latyn álipbıine kóshý bilimniń damýyna serpin bermek - professor Bazarbaeva
Osyndaı oıyn Almatyda QR Ulttyq kitaphanasynda ótken «Rýhanı jańǵyrý: Jańa qazaq álipbıi» taqyrybynda ótken dóńgelek ústel barysynda professor, fılologııa ǵylymdarynyń doktory Zeınep Bazarbaeva jetkizdi.
Basqosýda Qazaqstannyń shyǵarmashylyq qaıratkerleri, zııaly qaýym ókilderi qazaq tilin latyn álipbıine kóshirý týraly máseleni talqyǵa saldy.
«Qazaq tilin latyn álipbıine kóshirý protsesin bilim men ǵylymnyń damýynyń bir bólshegi retinde qarastyrýǵa bolady. Osydan 7-8 jyl buryn oqytýdyń Bolon protsesine kóshtik. Bul 3 satyly bilim berý júıesin bildiredi. Magıstratýradan doktorantýraǵa túsý úshin TOEFL men IELTS sertfıkattary talap etiledi. Doktorantýraǵa túsý úshin aǵylshyn tilinde maqala oqý talap etiledi. Latyn grafıkasynda jańa álemdik maqalalarmen tanysý ońaı bolmaq. Muny sol protsestiń jalǵasy dep tanýǵa bolady», - dedi Zeınep Bazarbaeva.
Onyń aıtýynsha, jańa álipbıge kóshý qazaq tilin meńgerýdi jeńildetpek.
«Bul qazaq tilin álemdik aqparattyq kommýnıkatsııalyq keńistikke engizýge jasalǵan jaǵdaı bolyp qalmaq. Shynynda sońǵy jyldary qazaq tiliniń mártebesi kóterilip keledi. Qazaq tiliniń yqpaly otanymyzda ǵana emes, shetelde de ósti. Sheteldegi qazaqtar latyn jazýyna negizdelgen aqparattyq júıeni qoldanady. Jastardyń kóbi latyn álipbıin qoldanady. Olar shet tilin bilýge yntaly», - dedi professor Bazarbaeva.
Aqyn, Halyqaralyq Alash syılyǵynyń laýreaty Qazybek Isa jańa álipbıdegi basty talap qazaq tiliniń tól dybystaryn saqtap qalý ekendigin atap ótti.
«Memleket basshysynyń alǵashqy álipbıge qol qoıa salmaı, qoǵam talqysyna jibergeni óte qýantarlyq jaıt. Sonyń arqasynda kóńilge qonymdy nusqa keldi. Onyń ústine jańa aıtylǵandaı bul dáıekshe (apostrof) arqyly jazýdy eń alǵash Alash zııalysy Ahmet Baıtursynov babamyz engizgen. Bul búgingi zamanda da ózekti bolyp tur. Eń bastysy, ózimizdiń tól dybystarymyzdy joǵaltyp almaý», - dedi Qazybek Isa.