Latyn álipbıi tek qazaq tiline qatysty ekenin uǵýymyz kerek - Darhan Myńbaı

ASTANA. QazAqparat - Qazaqstan halqy Assambleıasy tóraǵasynyń orynbasary Darhan Myńbaı latyn álipbıine ótý - ulttyq kodty saqtaýdy sheshim ekenin málim etti. Ol bul pikirdi Astanadaǵy «Zamanaýı polıetnıkalyq memleket: ulttyq modelder jáne damý strategııalary» halyqaralyq forýmynda aıtty, dep habarlaıdy «QazAqparat» HAA tilshisi.

Forýmǵa Reseı, QHR, Ózbekstan, Qyrǵyzstan, Belarýs elderinen kelgen sarapshylar, sonymen birge, halyqaralyq qatynastar salasyndaǵy otandyq sarapshylar qatysýda.

«Málimetterge qaraǵanda,  álemde ár túrli tilde sóıleıtin 5 myńnan 7 myńǵa deıin ult, al 190-nan asa ǵana memleket bar. Sondyqtan,kóp ultty memleketterdiń kóbi ıntegratsııalanýdyń ulttyq modelin jasaýǵa kúsh salýda. Osy rette Elbasy  óz sózinde Shyǵysta da, Batysta da bizdiń tájirıbe joǵary baǵalanatynyn atap ótken bolatyn.

Qazaqstandaǵy qoǵamdyq dıalogtyń tájirıbesin neǵurlym kóp el qoldansa, soǵurlym beıbitshilik bekı túsedi. Ol tájirıbeni eýrazııalyq keńistiktiń barlyq jerinde qoldanýǵa bolady. Álbette, etnosararazlyq kelisimge kelý úshin qazaqstandyq tájirıbeni engizý jóninde úgit júrgizip otyrǵan joqpyz», - dedi Darhan Myńbaı.

Tóraǵanyń orynbasary óz sózinde BUU, EQYU sııaqty halyqaralyq uıymdar avtory Nursultan Nazarbaev bolyp otyrǵan qazaqstandyq tájirıbeni joǵary baǵalaıtynyn atap ótti.

Sondaı-aq Darhan Myńbaı  Qazaqstan rýhanı jańǵyrýǵa bet alǵanyn, al bul baǵyttyń basty mindetteriniń biri latyn álipbıine kóshý ekendigin jetkizdi.

«Assembleıa memlekettik tildiń latyn grafıkasyna ótý jumysyna erekshe at salysyp keledi. Latyn álipbıine ótý «Rýhanı jańǵyrý»baǵdarlamasynyń júregi dep aıtsaq bolady. Memlekettik til qoǵamdy biriktiretin basty faktorlardyń birine aınalýy kerek. Al latyn álipbıine ótý tildiń úılesimdi túrde óristeı túsýine serpin beredi. Bul baǵyt úsh tildilikti engizýge septigin tıgizip, jas urpaqqa úsh tildi de erkin meńgerýine óziniń úlesin qosady», - deıdi ol.

Darhan Myńbaı sonymen birge, «Rýhanı jańǵyrý» baǵdarlamasynyń dál osyndaı mańyzdy jobasy shetelde de óz mańyzyn tabatynyn málim etti.

«Shettegi mıllıondaǵan qandastarymyz latyn álipbıi arqyly tarıhı otanyna jaqyndaı túsedi. Qazaq tilin latyn álipbıine kóshirý bul ýaqyttyń talaby.  Bul básekege qabilettilikti, beıbitshilikti, ashyqtyq pen pragmatızmdi, ulttyq kodty saqtaýdyń sheshimi. Biz latyn álipbıine ótý tek qana qazaq tiline qatysty ekenin túsinýimiz kerek. Biraq qazaq tili búkil qazaqstandyqtarǵa qatysty. Eń basty maqsatymyz - básekege qabilettilik, pragmatızm, bilim men ashyqtyq qasıeti tán qoǵamdyq sanany qalyptastyrý. Bul álbette az ýaqyttyń jumysy emes», - deıdi Darhan Myńbaı.