Latyn álipbıi bolashaqqa qyzmet etedi - Darhan Myńbaı

ASTANA. QazAqparat - Latyn qarpindegi álipbı bolashaqqa qyzmet etedi. Búgin Qazaqstan halqy Assambleıasy Tóraǵasynyń orynbasary Darhan Myńbaı osylaı málim etti, dep habarlaıdy QazAqparat.

«Prezıdentke usynylǵan  qazaq tiliniń latyn qarpine negizdelgen biryńǵaı standartynyń jańa jobasy halyqtyń kútkenine jaýap boldy. Aldynda tanystyrylǵan birinshi nusqaǵa qatysty keıinnen kóptegen usynystar jasalǵany belgili. Onyń barlyǵy bizdiń álipbıge, memlekettik tilge degen úlken janashyrlyqtyń kórinisi. Osy oraıda ǵalymdar men til mamandarynyń aıtqan pikirleri qamtylyp, talqylaýǵa emin-erkin múmkindik berildi. Ekinshiden, shynyn aıtqanda, memlekettik tildi Qazaqstanda turatyn barlyq azamattardyń bilgenin qalaımyz ǵoı. Sondyqtan keshe tanystyrylǵan joba qolaıly ári tıimdi dep oılaımyn jáne halyqtyń kóńilinen shyǵady degen senimdemin. Óıtkeni bul turǵyda tilge qatysty sabaqtastyq saqtalǵan»,-dedi Darhan Myńbaı.

Onyń sózine qaraǵanda, qazaq tilin basqa ult ókilderi tezirek meńgerýi úshin álipbı barynsha ámbebap bolýy tıis.

«Sońǵy usynylǵan joba basqa tilderde sóıleıtin adamdarǵa bizdiń tildi jyldamyraq úırenýdi yntalandyratyn nusqa bolyp tur. Atap aıtqanda, Elbasynyń aldynda talqylanǵan osy joba barlyq taraptardy qanaǵattandyrady dep paıymdaımyn. Qazirgi zamannyń talabyn eskere otyryp, keshe usynylǵan nusqa ońtaıly bolyp otyr»,-dedi QHA Tóraǵasynyń orynbasary.

Esterińizge sala keteıik, bıylǵy 9 qazanda Memleket basshysy Nursultan Nazarbaev memlekettik tildi latyn álipbıine kóshirý jobasy boıynsha jumys tobynyń múshelerin qabyldady. Jıynda Memleket basshysyna qoǵamdyq talqylaýlar barysynda kelip túsken usynystardy eskere otyryp ázirlengen qazaq tiliniń latyn qarpine negizdelgen biryńǵaı standartynyń jobasy usynyldy .