Latyn álipbıi básekege áldeqaıda qabiletti - Erbol Tileshov

ORAL. QazAqparat - Latyn álipbıi básekege áldeqaıda qabiletti. Bul týraly Oralda ótken «LATYN FEST» jastar forýmynda aıtyldy, dep habarlaıdy QazAqparat tilshisi.

Elbasy N.Á.Nazarbaevtyń «Bolashaqqa baǵdar: rýhanı jańǵyrý» maqalasynda taıaý jyldary qazaq jazýyn latyn qarpine kóshirýdiń mán-mańyzy aıtylǵany málim.

Atalmysh jıynda osy kókeıkesti másele talqylandy.

«Qazaqstan Prezıdenti Qasym-Jomart Toqaev halyqqa Joldaýynda qazaq tiliniń mártebesi arta túsetinin, bolashaqta ultaralyq qarym-qatynas tiline aınalatynyn atap ótti. Osy oraıda qazaq tilin latyn álipbıine kóshirý - rýhanı jańarýdy bekite túsip, ulttyq kodty saqtaıtyn asa mańyzdy mindettiń biri», - dedi oblys ákiminiń orynbasary Serik Egizbaev.

Sh.Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń atqarýshy dırektory Erbol Tileshev atap ótkendeı, latyn álipbıi dúnıe júzine keńinen tanymal.

«Álemde qyryqqa jýyq álipbı bar. Osyndaǵy kırıll álipbıiniń úlesi - 3 paıyz. Biz qazir osy azshylyqtyń ishindemiz. Elderdiń 36 paıyzy latyn qarpin qoldanady. 200 mln-ǵa jýyq túrki halqy bolsa, sonyń 55,6 paıyzy latynǵa kóship úlgerse, 17,7 paıyzy kırılshe jazyp oqıdy. Ǵylymı eńbekterdiń 77 paıyzy latyn negizdi álipbımen jazylady. Sondyqtan latyn álipbıi kırılge qaraǵanda 250 ese básekege qabiletti», - dedi Erbol Tileshev.

Belgili jýrnalıst, «Atyraý» telearnasynyń dırektory Qanat Áýesbaı latyn qarpine kóshýdi nasıhattaý kerektigin, onyń kezeń-kezeńmen engizilip, birneshe jylǵa sozylatynyn jetkizdi.

Sondaı-aq saıasattanýshy, jýrnalıst, qoǵam belsendisi, «AmalBooks» baspasynyń jetekshisi Baqytjan Buqarbaı latyn qarpine kóshýdiń utymdy joldaryna toqtaldy.

Forým barysynda memlekettik tildiń mártebesin nyǵaıtýǵa úles qosyp júrgen til janashyrlary Qazaqstan Prezıdentiniń alǵyshatymen marapattaldy.