Latvııada Abaıdyń 175 jyldyǵy aıasynda toǵyzqumalaqtan jarys ótti

NUR-SULTAN. QazAqparat – Latvııanyń Olaıne qalasynda Abaı Qunanbaıulynyń 175 jyldyǵyn merekeleý aıasynda uly oıshylymyz súıip oınaǵan ulttyq oıyn -toǵyzqumalaqtan halyqaralyq týrnır ótti, dep habarlaıdy QazAqparat tilshisi.

Dúnıejúzilik toǵyzqumalaq federatsııasy habarlaǵandaı, jarysty 24-26 qańtar aralyǵynda latvııalyq «Logıka» zııatkerlik klýby, Qazaqstan Respýblıkasynyń Latvııadaǵy elshiligi jáne Dúnıejúzilik toǵyzqumalaq federatsııasy uıymdastyrdy.

Jarysqa Qazaqstannan jáne Latvııanyń Rıga, Olaıne, Elgava men Ozolnıekı qalalarynan 24 sportshy qatysty.

Úsh kúnge sozylǵan dodada uldar arasynda júldeli oryndardyń barlyǵyn latvııalyq oıynshalar jeńip aldy. Al qyzdar arasynda bas júldeni qazaqstandyq Ańsaǵan Qojanásip jeńip alsa, ekinshi jáne úshinshi oryndardy jergilikti oıynshalar qanjyǵasyna baılady.

Jeńimpazdar men júldegerler Qazaqstan Respýblıkasynyń Latvııadaǵy elshiligi men Dúnıejúzilik toǵyzqumalaq federatsııasynyń syılyqtarymen marapattaldy.

Aıta keteıik, alǵash ret toǵyzqumalaq Latvııada 2018 jyly jergilikti turǵyndarǵa tanystyrylyp, Elshilik pen Federatsııanyń bastamasymen jarys ótkizilgen bolatyn.

Nátıjesinde 2019 jyly Túrkııada toǵyzqumalaqtan ótken V Álem chempıonatyna Latvııanyń quramasy alǵash ret qatysyp, mol tájirıbe jınaǵan edi.