Lańkestik: 10 kún ishinde Shymkentke kelgen shyǵyn kólemi esepteledi
Jappaı tártipsizdikten «Túrkistan» saraıy, «Kórme» ortalyǵy (tolyǵymen), J. Shanın atyndaǵy drama teatryna ár túrli deńgeıde zııan kelgen. Odan bólek, «Metro» saýda ortalyǵyna basyp kirip, barlyq spırttik ishimdikter men energetıkalyq sýsyndardy alyp ketken. Saýda ortalyǵynyń ishin qıratyp, eki jerde órt shyǵarý áreketine barǵan jáne bankomattar tonalǵan. Sol kúnderi lańkester kóptegen polıtsııa avtokóligi men qoǵamdyq avtobýstardy jaǵyp jiberdi. Shymkent qalasyna jasalǵan lańkestik jáne jappaı buzaqylyq áreketterge baılanysty qala ákimi Murat Áıtenovtiń basshylyǵymen arnaıy shtab quryldy.
Qala ákimi zardap shekken nysandardyń barlyǵyn aralap, materıaldyq shyǵyndardy anyqtaý úshin qurylǵan arnaıy komıssııaǵa naqty tapsyrmalar berdi. Aldaǵy 10 kún ishinde jalpy shyǵyn mólsheri anyqtalatynyn atap ótti.
«Qaladaǵy qaýipsizdik pen tynys-tirshilik úshin kerekti barlyq jumystar baqylaýymda. Qoǵamdyq kólikter men bıznes nysandary shtattyq rejımde jumys jasaýda. Antıterror is-sharasy júrgizilip jatqandyqtan, qala turǵyndaryn barynsha úıden shyqpaýǵa jáne balalardy qaraýsyz qaldyrmaýǵa shaqyramyn. Jastarymyz túrli arandatýshylyqqa jol bermeı, sabyrlyq tanytýy kerek. Qala turǵyndary men qonaqtaryn kommendanttyq tártipti saqtaýǵa shaqyramyn», - dedi Murat Áıtenov.
Qazirgi tańda qaladaǵy jaǵdaı turaqty jáne baqylaýda. Turǵyndardyń tynys-tirshiligi úshin kerekti barlyq qurylymdar óz jumysyn tolyqqandy atqarýda.