Lakshmı Mıttal Qazaqstan Úkimetimen jasalǵan mámile týraly aıtty

<p>Lakshmı Mıttal Qazaqstan Úkimetimen jasalǵan mámilege qatysty pikir bildirdi. <a href="https://kaz.inform.kz/" target="_blank" rel="noopener">Kazinform</a> bul týraly <a href="https://corporate.arcelormittal.com/about/arcelormittal-transfers-ownership-of-arcelormittal-temirtau-to-a-wholly-owned-entity-of-the-government-of-kazakhstan" target="_blank" rel="noopener">ArcelorMittal</a> korporatsııasynyń saıtyna silteme jasap habarlaıdy.&nbsp;</p>

«Osy múmkindikti paıdalana otyryp, «ArselorMıttal Temirtaý» kompanııasynyń qyzmetkerlerine sońǵy 28 jyl ishinde qosqan úlesi úshin alǵys aıtqymyz keledi. Bıznes úlken qıyndyqtarǵa tap bolǵanymen, maqtanýǵa turarlyq kóptegen eleýli jetistikter de bar. «ArselorMıttal Temirtaý» «ArselorMıttaldyń» óte qundy bóligi boldy. Qazaqstan jaıly jáne bizben qyzmettes bolǵan barlyq adam týraly estelikterdi ózimizben alyp ketip baramyz», - delingen habarlamada.

Qazaqstan Úkimeti men ArcelorMittal mámileni aıaqtady. Onyń aıasynda Úkimet baqylaýyndaǵy jeke kapıtal qory Qazaqstan Investment Corporation («QIC»)  «ArselorMıttal Temirtaý» AQ men «ArselorMıttal Týbýlar Prodakts Aktaý» AQ aktsııalarynyń 100%-yn satyp aldy. Kóp aılyq talqylaýdyń nátıjesi bolyp sanalatyn bul kelisim strategııalyq turǵydan «ArselorMıttal Temirtaý» kompanııasynyń bolashaǵyn qamtamasyz etýge baǵyttalǵan jáne barlyq qatysýshy taraptyń ózara múddesine saı keledi.

Mámile sharttaryna sáıkes aktıvter portfeli «sol qalpynda» beriledi. Osylaısha, kelisimge qol qoıylǵannan keıin QIC «ArselorMıttal Temirtaý» kompanııasynyń qyzmetine tolyq baqylaý júrgizý men jaýapkershilikti óz moınyna aldy. Kompanııa rebrendıngten ótip, jańa ataýmen jumys isteıtin bolady.

ArcelorMittal 1995 jyldan beri bolat zaýyty men biriktirilgen temir rýdasy men kómir shahtalaryna ıelik etti. Osylaısha shamamen otyz jylǵa jýyq ýaqyt eldegi biriktirilgen bolat óndirisin jalǵastyrýǵa yqpal etti. Bolat jáne taý-ken aktıvteri jergilikti jáne aımaqtyq ekonomıkada mańyzdy ról atqarady.

Jańa menshik ıesi retinde Qazaqstan Úkimetine kompanııanyń uzaqmerzimdi qarjylyq jáne operatsııalyq turaqtylyǵyna qolaıly jaǵdaı jasaý mindeti júkteldi. Aǵymdaǵy operatsııalardyń úzdiksiz júrgizilýin qamtamasyz ete otyryp, barlyq qoldanystaǵy bıznes-protsesterdiń tıimdiligin saqtaý ǵana emes, sonymen qatar arttyrý óte mańyzdy. Buǵan qosa, úkimet kompanııanyń ınnovatsııalyq damý baǵyttaryn ilgeriletýge mindetteledi.

Mámile sharttaryna sáıkes, ArcelorMittal sońǵy ótemaqy retinde 286 mıllıon AQSh dollaryn aldy. Bul shamamen 800 mıllıon AQSh dollaryna teń kapıtalǵa teris áser etti.

Aıta keteıik, búgin «ArselorMıttal Temirtaýǵa» qatysty mámile aıaqtalǵany habarlanǵan bolatyn. Sondaı-aq búgin jańa ınvestor resmı túrde jarııalandy. Ol qazaqstandyq kásipker Andreı Lavrentev bolatyn. Sonymen qatar AMT resmı túrde QARMET dep ózgertildi.