Lagerlerde demalatyn oqýshylar sany jarty mıllıonǵa ósti

NUR-SULTAN. QazAqparat - Jazǵy demalysta balalardy saýyqtyrý lagerlerinde 2,3 mln qazaqstandyq oqýshy demalady. Bul byltyrmen salystyrǵanda jarty mıllıonǵa kóp. Bul týraly QazAqparat BǴM silteme jasap habarlaıdy.

Sonymen qatar bıyl saýyqtyrý lagerleri men alańdardyń sany aıtarlyqtaı artty. Jalpy respýblıka boıynsha 11 myńnan asa (2021 j. – 9 507) mektep janyndaǵy, qala mańyndaǵy, shatyrly, sporttyq jáne kıiz úı lageri jumys isteıdi.

«Birinshi kezekte jazǵy saýyqtyrý demalysymen áleýmettik osal sanattaǵy balalar qamtylady. Bul jetim balalar, az qamtylǵan, kópbalaly otbasy jáne tolyq emes otbasylardan shyqqan balalar, múmkindigi shekteýli balalar jáne t.b. Balalar saýyqtyrý lagerleriniń jelisi sanatorııler, týrıstik bazalar, ulttyq parkter, joǵary oqý oryndary janynan lagerler ashý jáne jumys istemeıtin lagerlerdi qalpyna keltirý esebinen keńeıtildi. Qalalyq lagerler jelisin damytý jumystary júrgizilip jatyr. Bıyl Qyzylorda oblysynda 3 jáne Aqmola oblysynda 1 lager paıdalanýǵa beriledi. Balalardyń jazǵy demalysy úshin qolaıly jáne qaýipsiz jaǵdaılardy qamtamasyz etý mańyzdy. Qazir ashylýǵa daıyndalyp jatqan lagerlerde konkýrstyq rásimder júrgizilip, olardyń sanıtarlyq normalarǵa sáıkestigi tekserilip jatyr», - dep aıtty QR BǴM Balalardyń quqyqtaryn qorǵaý komıtetiniń tóraǵasy Esenǵazy Imanǵalıev.

Osy jyly balalar men ata-analardy barynsha aqparattandyrý úshin bala-demalys.kz balalar saýyqtyrý lagerleriniń ınteraktıvti kartasy, saıt pen mobıldi qosymsha (Android jáne IOS platformalarynda) iske qosyldy. Elektrondy kartanyń kómegimen kez kelgen adam naqty ýaqyt rejıminde qandaı da bir lager týraly (baǵdarlamasyn, baǵasyn, ornalasqan jerin) aqparat ala alady.