La Skala teatrynyń Astanadaǵy gastrolderi aıaqtaldy

ASTANA. QazAqparat - Astanada ataqty La Skala teatrynyń gastrolderi aıaqtaldy, dep habarlaıdy QR Mádenıet jáne sport mınıstrliginiń baspasóz qyzmeti.

Mılandyq trýppanyń 6 óner keshinde anshlag boldy, ıaǵnı 7 500 kórermen teatr ónerine tánti boldy. «Astana Operada» ótken La Skalanyń gastroldik spektaklderine alys-jaqyn shetelden qonaqtar keldi. Shveıtsarııa, Sıngapýr, Latvııa, AQSh jáne basqa elderden onlaın bıletter satylyp alyndy.

Eske salar bolsaq, «Astana Operanyń» Úlken zaly sahnasynda álemdegi eń tanymal opera teatrynyń orkestri, hory men solısteri Dj. Verdıdiń «Falstaf» operasyn tórt ret kórsetip, Bethovenniń №9 sımfonııasyn eki márte shyrqady. Mýzykalyq synshylar La Skalanyń qazaqstandyq gastrolderine joǵary baǵa berýde.

Sońǵy óner kórsetý aldynda Mádenıet jáne sport mınıstri Arystanbek Muhamedıuly sahna tórinen mılandyq teatr trýppasyna, qazirgi zamannyń ataqty maestrosy Zýbın Metaǵa sheksiz alǵysyn bildirip, mýzyka súıer qaýymǵa shynaıy ónermen qaýyshý qýanyshyn syılaǵany úshin rahmetin aıtty. «Eki eldiń mádenıetin gúldendirýge baǵyttalǵan shyǵarmashylyq baılanysymyz jalǵasyn tabady dep úmittenemiz, sebebi mýzyka tili ámbebap - halqymyzdy biriktiretin dostyq kópiri ispettes. Maestro Zýbın Metaǵa, dırektor Aleksandr Pereıraǵa jáne La Skala teatrynyń barlyq ujymyna densaýlyq, shyǵarmashylyq tabys jáne amandyq tileımiz», - dep málim etti Arystanbek Muhamedıuly.

Osy bir jarym apta bir kúndeı zymyrap óte shyqty. Aty ańyzǵa aınalǵan La Skala teatry ujymynyń óner kórsetýleri Qazaqstannyń astanasyna barsha álemdik mýzykalyq qaýymdastyqtyń nazaryn aýdartty. Sondaı-aq qazaqstandyq jáne sheteldik BAQ arasynda úlken rezonans týdyrdy.

Áıgili teatrdyń Qazaqstanǵa kelýi boıynsha shyǵyndardy Eni munaı-gaz kompanııasy men teatrdyń áleýmettik seriktesi - «Samruk-KazynaTrust» qory óz moınyna aldy.