La Manshty qaıyqpen kesip ótpek bolǵan tórt adam kóz jumdy

ASTANA. QazAqparat – Sársenbi kúni tańerteń La Manshta mıgranttar mingen qaıyq apatqa ushyrap, kem degende tórt adam qaıtys boldy. Ulybrıtanııa júrgizgen qutqarý operatsııasynyń nátıjesinde 43 adam qutqaryldy, olardyń 30-y sýdan shyǵaryldy, dep habarlaıdy QazAqparat VVS-ge silteme jasap.

Aıazdy eskere otyryp, zardap shekkenderdiń sany artýy múmkin dep boljam bar.

Seısenbiden sársenbige qaraǵan túni bul aımaqtaǵy aýa temperatýrasy 1°C-qadeıin tómendedi, sý temperatýrasy +12°C.

Qaıyq Grınvıch boıynsha túngi saǵat úsh shamasynda Dývrdan 50 km qashyqtyqta Dandjenessa jaǵalaýynda apatqa ushyrady.

Ulybrıtanııa men Frantsııa sársenbi kúni tańerteń aýqymdy qutqarý jumystaryn júrgizdi.

Ulybrıtanııanyń jaǵalaý kúzeti, Frantsııa áskerı-teńiz kúshteri jáne sanıtarlyq avıatsııa kómekke jiberildi.

Osy aýdanda ornalasqan balyq aýlaý qaıyǵy men tikushaqtar da jumyldyryldy.

«Búgin tańerteń maǵan qaıǵyly oqıǵa týraly habarlandy. Meni únemi habardar etip otyrady, bizdiń agenttikter barlyq faktilerdi shuǵyl túrde anyqtaıdy», - dep atap ótti ishki ister mınıstri Sýella Braverman.

Qaıyqta Frantsııadan sý arqyly Ulybrıtanııa shekarasyn kesip ótken mıgranttar bolǵan bolýy múmkin.

Bul aýqymdy qutqarý operatsııasy – ótken qarashada Frantsııadan Ulybrıtanııaǵa bet alǵan 27 mıgrant mingen qaıyq sýǵa batyp ketkennen bergi birinshi operatsııa.

Jumadan jeksenbige deıin La-Mansh arqyly Ulybrıtanııaǵa 460 adam qaıyqpen jetken, al bıyl olardyń jalpy sany 45 myńǵa jýyqtady.

Seısenbi kúni premer-mınıstr Rıshı Sýnak shaǵyn qaıyqpen jasalǵan zańsyz kóshi-qonnyń aldyn alý úshin jańa sharalar qabyldanatynyn jarııalady.

Parlamentte sóılegen sózinde premer-mınıstr mıgranttardy sý arqyly zańsyz tasymaldaýǵa qarsy kúresetin arnaıy top qurý josparlanyp otyrǵanyn aıtty.

Bul bólimge qaıyqtardy barlaý men ustaýdy úılestiretin áskerı jáne azamattyq mamandar birigedi.

Foto: bbc.com