L.N.Gýmılev atyndaǵy EUÝ otandyq joǵary oqý oryndary arasynda kóshbasshynyń birine aınaldy - N. Nazarbaev

ASTANA. QazAqparat - Qazaqstan Respýblıkasynyń Memlekettik hatshysy Gúlshara Ábdiqalyqova L.N.Gýmılev atyndaǵy Eýrazııa ulttyq ýnıversıteti Ǵylymı keńesiniń osy oqý ornynyń 20 jyldyǵyna arnalǵan saltanatty jıynyna qatysty, dep habarlady Aqordanyń baspasóz qyzmeti.

Saltanatty sharaǵa memlekettik organdar, dıplomatııalyq korpýs, ǵylym jáne bilim salasy, BAQ ókilderi, kórnekti qoǵam qaıratkerleri, Qazaqstan jáne shetel ýnıversıtetteriniń rektorlary, joǵary oqý ornynyń túlekteri, stýdentter qatysty.

Sharanyń ashylýynda sóz sóılegen G.Ábdiqalyqova Memleket basshysynyń quttyqtaýyn oqyp berdi. Quttyqtaýda 1996 jyly arnaýly jarlyqpen qurylǵan ýnıversıtet búginde otandyq joǵary oqý oryndary arasyndaǵy kóshbasshynyń birine aınalǵany jáne Astananyń rýhanı ári zııatkerlik ortalyǵy bolyp otyrǵany atap kórsetilgen. Qazaqstan Prezıdentiniń Eýrazııa ulttyq ýnıversıteti aldaǵy ýaqytta da «Máńgilik El» jalpyulttyq patrıottyq ıdeıasyn iske asyrý úshin bilikti mamandar daıarlaıtyn mańyzdy ǵylymı-aǵartýshylyq mekemeniń biri bolyp qala beretinine senim bildirgeni aıtylǵan.

Búginde Eýrazııa ulttyq ýnıversıteti - eýrazııalyq ıdeıanyń is júzine asýy, sonymen qatar Eýropanyń, Azııanyń, Amerıkanyń 258 joǵary oqý ornymen, túrli ǵylymı-zertteý ortalyqtarymen, shet memleketterdiń elshilikterimen, halyqaralyq bilim qorlarymen yntymaqtastyq ornatqan bolashaqtyń ýnıversıteti.

Qazirgi ýaqytta L.N.Gýmılev atyndaǵy EUÝ-da kópdeńgeıli daıarlyqtan ótkiziletin 168 mamandyq boıynsha 16 myńnan astam stýdent bilim alýda. Munda 2011 jyldan bastap 250-den astam pán aǵylshyn tilinde oqytylady. Nursultan Nazarbaevtyń bastamasymen 2000 jyly ýnıversıtet bazasynda M.V.Lomonosov atyndaǵy Máskeý memlekettik ýnıversıtetiniń qazaqstandyq fılıaly ashyldy.