L.Hochıeva: «Máńgilik el» qundylyqtary - azamattyq teńdik, joǵary mádenıet pen bilim, adal eńbek

ASTANA. QazAqparat - "Máńgilik el" baǵdarlamasynyń basty qundylyqtary - azamattyq teńdik, joǵary mádenıet pen bilim, adal eńbek. Qazaqstan halqy Assambleıasy keńesiniń múshesi Lıýdmıla Hochıeva Ortalyq kommýnıkatsııalar qyzmetinde bergen baspasóz máslıhatynda osylaı dedi.

"Máńgilik el" ıdeıasynyń qundylyǵy - ol, árıne, azamattyq teńdik, joǵary mádenıet pen bilim, adal eńbek, toleranttylyq. Osynyń bári jarqyn bolashaqqa bastaıdy. Biz táýelsizdik jyldarynda qol jetkizgen jetistikterdi abyroımen alyp júrý jastardyń moınyna artylady. 90-shy jyldary álem elderi quldyrap jatqanda, biz ózimizdiń eń qundy baılyǵymyz - Táýelsizdikke qol jetkizdik. Biz osy ýaqytqa deıin namysymyzdy, qasıetimizdi, abyroıymyzdy qulatpaı keldik, qıyn-qystaý zamannyń barlyq asýlarynan óttik", - dep atap ótti eks-depýtat.

Onyń sózine qaraǵanda, táýelsizdikti alý az, ony abyroımen jarqyn bolashaqqa bastap barý mańyzdy.

"Búginde álemniń tórinen oryn alǵan bizdiń Kók Baıraǵymyz jelbirep tur. Osynyń barlyǵyn bolashaqqa jetkizýimiz kerek. Bul eńbekpen keledi. Prezıdent pen halyqtyń jumyla atqarǵan qyrýar eńbegimen qol jetkizdik te. Sebebi halyq óz Prezıdentine sendi. Biz Elbasynyń qolǵa alǵan reformalary arqyly úlken qıyndyqtardy eńserdik", - dep túıdi sózin L. Hochıeva.