«Qyzyńyz jol apatyna tústi» — Qostanaıda zeınet jasyndaǵy turǵyndardy san soqtyrǵan alaıaq ustaldy
Qostanaı oblysynyń polıtsııasyna Qostanaı qalasynyń 6 turǵynynan «Sizdiń qyzyńyz jol apatyna tústi» degen dástúrli shemany paıdalanyp, olardy alaıaqtar aldaǵany týraly aryz tústi. Zalal somasy 20 mln teńgeden asqan. Barlyq ótinishter boıynsha QR QK-niń 190-baby 3-bóligi (Alaıaqtyq) boıynsha sotqa deıingi tergeý bastaldy. Tergeýge «Cyberpol» bólimshesi men Qostanaı qalasy polıtsııa basqarmasynyń qyzmetkerleri kirisken.
– Jedel-tergeý is-qımyldaryn júrgizý kezinde oblys ortalyǵynyń 6 turǵyny zardap shekkeni anyqtaldy. Olardyń barlyǵy zeınettegi jáne zeınet jasyna jaqyndaǵan úlken kisiler. Olarǵa úı telefonyna qońyraýlar shalǵan belgisiz adamdar týystarynyń apatqa ushyraǵanyn habarlaǵan. Alaıaqtar qolda bar aqshany berýdi suraǵan, – dedi «CyberPol» bólimshesiniń qyzmetkeri Oljas Magyparov.
Sonymen birge, jábirlenýshiler ózderiniń úıine kelip otyrǵan qyzǵa aqsha bergen. Onyń syrtqy kelbeti týraly sıpattamalar ár túrli boldy. Kúdikti jasandy shash aýystyryp otyrǵan. Onyń ústine qara kózildirikti jáne ár túrli bas kıimderdi qoldanǵan.
– Alaıaq Qostanaı qalasyndaǵy qonaq úılerdiń birinde lıýks nómirinde ustaldy. Odan 800 myń teńge somasynda aqsha alyndy. Ol qalǵan qarajatty qymbat telefon, zattar men oıyn-saýyq quraldaryn satyp alýǵa jumsaǵan, – deıdi Oljas Maǵyparov.
Qazirgi ýaqytta kúdikti QR QІJK-niń 128-baby tártibimen qamaldy. Qostanaı oblysynyń polıtsııa departamenti taǵy da azamattardy abaı bolýǵa shaqyrady.
Alaıaqtar jańa shemalardy oılap taýyp qana qoımaı, burynnan kele jatqan stsenarıılerdi de qoldanady. Bul rette polıtseıler zańsyz áreketter nemese áreketsizdigi úshin bireýge aqsha berý qylmystyq jazalanatyn is-áreket ekenin eske salady.
Polıtsııa azamattardy muqııat bolýǵa, alaıaqtardyń qýlyǵyna túspeýge shaqyrady. Aqparatty tekserý, jaqyn adamyńyzǵa qońyraý shalyp jáne mundaı faktiler týraly polıtsııaǵa habarlaý qajet.