Qyzyljar ormanshylyǵyndaǵy qurǵaq shóp órti sóndirildi

KÓKShETAÝ. QazAqparat - Aqmola oblystyq TJD Qyzyljar ormanshylyǵy aýmaǵyndaǵy qurǵaq shóp órti sóndirilgenin málimdedi, dep habarlaıdy QazAqparat.

5 shildede saǵat 17.28-de Tselınograd aýdanynda Shubar aýylynan 20 shaqyrym qashyqtyqtaǵy Qyzyljar ormanshylyǵynyń aýmaǵynda 0,8 ga alańda qurǵaq shóp órtenip, 1,1 ga alańda orman tósenishine kóshti.

«Órttiń aldyn ala aýdany 1,9 ga qurady. Jedel qabyldanǵan kúshter men quraldardyń arqasynda órt saǵat 18.20-da oqshaýlandy, saǵat 21.10-da sóndirildi.

Órttiń sebebi anyqtalýda», - dep jazdy vedomstvodan.

Órtti sóndirýge ormanshylyqtan 40 adam men 3 tehnıka, Aqmola oblysy TJD 8 adam men 2 birlik tehnıka, Astana qalasy TJD 16 adam men 3 birlik tehnıka jumyldyryldy.

Aqmola oblysynyń TJD azamattardy órt qaýipsizdigi erejelerin saqtaýǵa shaqyrady.