Qyzylorlyqtardyń 90 paıyzy gazben qamtylatyn bolady
Qyzylorda oblysy eldi mekenderiniń 85 paıyzy «Beıneý-Bozoı-Shymkent» magıstraldi gaz qubyrynyń boıynda ornalasqan. Jalpy uzyndyǵy 1143 shaqyrym bolatyn gaz qubyry Mańǵystaý, Aqtóbe, Qyzylorda jáne Túrkistan oblystarynyń aýmaǵynan ótedi. Sondyqtan aldaǵy ýaqytta aımaqta gaz ıgiligin kóretin eldiń qatary kóbeıedi dep josparlanyp otyr.
Óńirde gazdandyrý jobasynyń birinshi kezeńi bes jyl buryn bastaý aldy. Qazirgi tańda Aral, Áıteke bı, Shıeli jáne Jańaqorǵan sekildi oblystaǵy iri aýdan ortalyqtary «kógildir otyn» ıgiligine qol jetkizdi. Búgingi kúnderi Qarmaqshy, Jalaǵash, Syrdarııa aýdandarynyń ortalyqtary boıynsha gaz tartý jumystary júzege asyp jatyr. Bıyl olar da «kógildir otynǵa» qol jetkizedi.
Aýdan ortalyqtarynan bólek oblystaǵy birqatar aýyldar da gazǵa qosylyp úlgerdi. Byltyr Shıeli aýdanyndaǵy Ybyraı Jaqaev jáne Bıdaıkól aýyldary atalmysh ıgilikke alǵash qosylǵan aýyldar qatarynda sanalady.
Qazir oblys halqynyń 64, Qyzylorda qalasy turǵyndarynyń 95 paıyzy gaz ıgiligin kórip otyr.
Aıta keterligi, Astana qalasyn gazdandyrý maqsatynda qolǵa alynyp otyrǵan «Saryarqa» magıstraldi gaz qubyrynyń qurylysy da Qyzylorda oblysynan ornalasqan. Ol «Qaraózek» gaz kompressorlyq stantsııasynan bastalady.