Qyzylordanyń Jumyspen qamtý ortalyǵyna turǵyndardyń jappaı jınalýyna kim jol berdi

QYZYLORDA. QazAqparat - Qyzylorda qalalyq Jumyspen qamtý ortalyǵynda turǵyndardyń jappaı jınalýy boıynsha áleýmettik jelide jarııalanǵan beınejazbaǵa baılanysty tıisti sala basshylary túsinikteme berdi, dep habarlaıdy QazAqparat tilshisi.

Jumyspen qamtý ortalyǵynda adamdardyń kóptep jınalýyna qatysty mán-jaıdy qala ákiminiń orynbasary Bektas Nurıdınov baıandap berdi.

««Bastaý bıznes» jobasy boıynsha kásipkerlik negizderine oqytýǵa ótinim qabyldanatyny týraly aldyn ala habarlandyrý jarııalanǵan bolatyn. Degenmen, turǵyndar arasynda oǵan qujat qabyldaý bir kúnniń ishinde júrgiziledi degen jalǵan habar taraǵan. Osynyń saldarynan ortalyq aýmaǵynda 500-den astam adam jınalǵan. Oryn alǵan qolaısyzdyqqa baılanysty keshirim suraımyz. Oqıǵanyń mán-jaıy tekserilýde. Keleńsizdikke jol bergen mamandar jumysyna qyzmettik tekseris júrgiziledi», - dedi Qyzylorda qalasy ákiminiń orynbasary Bektas Nurıdınov.

«Atameken» óńirlik kásipkerler palatasynyń «Bastaý bıznes» jobasy boıynsha kásipkerlik negizderine oqytýǵa ótinim qabyldaý 19-23 sáýir aralyǵynda júrgiziletini buqaralyq aqparat quraldarynda jarııalanǵan. Oqytý 26 sáýirden 3 qazanǵa deıin jalǵasady. Joba sheńberinde oblysta bıylǵy jyly 2500 adamdy oqytý kózdelgen. Onyń ishinde Qyzylorda qalasy boıynsha 535 adam bilim alady.

«Osy maqsatta 20 sáýirden bastap barlyq Jumyspen qamtý ortalyqtary turǵyndardy tirkep, joldama berýdi bastaǵan edi. Oqýǵa úmitkerler jergiliktik ákimdikke, halyqty jumyspen qamtý ortalyqtaryna nemese «Atameken Services» kásipkerlerdiń «biryńǵaı terezesi» portaly arqyly onlaın-ótinim bere alady», - dedi oblystyq Jumyspen qamtýdy úılestirý jáne áleýmettik baǵdarlamalar basqarmasynyń basshysy Gaýhar Qalmaqova.