Qyzylordanyń úzdik taýar óndirýshileri anyqtaldy

QYZYLORDA. QazAqparat- Qyzylorda qalasynda «Qazaqstannyń úzdik taýary» atty óńirlik kórme-baıqaý ótti, dep habarlady QazAqparat.

Taýar óndirýshiler kórmesimen oblys ákimi Qyrymbek Kósherbaev tanysty.

«Qazirgi tańda óńirimizdiń áleýmettik-ekonomıkalyq jaǵdaıyna úlesin qosyp otyrǵan 5 myńǵa jýyq shaǵyn jáne orta bıznes kásiporyndary men 35 myńnan astam jeke kásipkerler men sharýa qojalyqtary jumys isteıdi. Atalǵan sektorda 100 myńǵa jýyq adam jumyspen qamtylǵan - bul oblystaǵy ekonomıkalyq belsendi halyqtyń úshten bir bóligi»,- dep atap ótti aımaq basshysy.

Bıylǵy jyly baıqaýǵa 22 taýar óndirýshi qatysty. «Óndiristik maqsattaǵy úzdik taýar» atalymy boıynsha 1-oryndy «ElektroTehnologııa» JShS ıelense, 2-oryn «Polımer Prodýkt» JShS-ne buıyrdy. Al, úshinshi oryndy «MIR 2001» JShS jeńip aldy.

 «Halyqqa arnalǵan úzdik taýar» atalymy  boıynsha 1-oryndy «DALATEKS» JShS, 2-oryndy «Qyzylorda zaǵıptar  qoǵamy» oqý-óndiristik koperatıvi» JShS, 3-oryndy «PromKommertsKA» JShS ıemdendi. 

Sonymen qatar, «Úzdik azyq-túlik taýar» nomınatsııasy boıynsha 1-oryn «Aral tuz» AQ-ǵa, 2-oryn «Aral» servıstik daıyndaý ortalyǵy» JShS-ǵa, 3-oryn «Ermahanov»  JK-ge buıyrdy.

Baıqaý jeńimpazdary «EKSPO-2017» halyqaralyq kórmesi aıasynda Astana qalasynda ótetin respýblıkalyq kórme-baıqaýǵa joldama aldy.