Qyzylordanyń túıeleri Birikken Arab ámirlikterine eksporttala bastady
Arab túbeginde oısylqara tuqymyna suranys joǵary. Atalmysh aýmaqtaǵy tabıǵı jaǵdaı qatal. Onda kún aptap ystyq. Aınala - sýsyz shól dala. Osyǵan baılanysty jergilikti jurt sút jáne et baǵytynda túıe ósirýdi kózdeıdi. Mundaı túıe tuqymy bizdiń elimizde kóp kezdesedi. Osy maqsatta arab kásipkerleri álemniń birneshe memleketinde bolǵan. Bárin tarazylaı kele, Syr óńiri túıeleriniń ózderine qolaıly ekenine kóz jetkizgen.
«Olar birinshi kezekte 45 oısylqara tuqymyn satyp alýǵa toqtam jasap otyr. Sol maqsatta arnaıy ushaq ta jaldaǵan. Jyl sońyna deıin taǵy 100 túıe áýe kemesi arqyly Arab túbegine jol tartady. Sondaı-aq, olar Syr óńirinen 1000 bas qoı túligin de ala ketpek»,-deıdi oblystyq aýyl sharýashylyǵy basqarmasy basshysynyń orynbasary Pirmuhammed Syzdyqov.
Alǵashqy jarty jyldyqta oblystan syrtqa shyǵarylǵan aýyl sharýashylyǵy ónimderiniń quny 18 mln AQSh dollarynan asqan. Eksporttyq áleýet byltyrǵy kórsetkishpen salystyrǵanda 3 paıyzǵa ósken.
«Sońǵy jyldary oblysta et eksporty artyp keledi. Máselen, Shymkent qalasyndaǵy et kombınaty arqyly 1600 bas qoı etin Iranǵa jiberdik. Sol et kombınaty arqyly taǵy 3000 bas qoı etin eksportqa shyǵarýdy josparlap otyrmyz», - deıdi Pirmuhammed Syzdyqov.
Qyzylordada Iranǵa kúrish eksporttaý isi jolǵa qoıylǵan. Osy maqsatta Syr dıqandary ırandyq kúrish sorttaryn ósire bastady. Sondaı-aq, et eksporty baǵytynda da birqatar jobalar qolǵa alyndy.