Qyzylordanyń memlekettik-jekeshelik áriptestik salasyndaǵy tájirıbesi ózgelerge úlgi bolmaq

QYZYLORDA. QazAqparat - Qyzylorda oblysynda 400-ge jýyq jekemenshik balabaqsha bar. Ol memlekettik bilim berý tapsyrysy berilgen mektepke deıingi bilim mekemeleriniń jalpy sanynyń 71 paıyzyn quraıdy. Bul - elimiz boıynsha eń jaqsy kórsetkish, dep habarlaıdy QazAqparat tilshisi.

Syr óńirinde QR Parlamenti Senatynyń Áleýmettik-mádenı damý jáne ǵylym jónindegi komıtetiniń kóshpeli otyrysy bolyp ótti. QR Parlamenti Senatynyń depýtattary jumys saparymen Qyzylorda oblysyna keldi. Olar aımaqtaǵy áleýmettik nysandardyń jumysymen tanysady.

«Qazirgi tańda memlekettik-jekeshelik áriptestik aıasynda óńirde 75 joba júzege asyrylýda. Basym bóligi densaýlyq saqtaý salasy boıynsha, ıaǵnı 75 jobanyń 29-y nemese 39 paıyzy osy salaǵa tıesili. Sondaı-aq, sport, bilim berý, tsıfrlandyrý jáne turǵyn úı-kommýnaldyq sharýashylyǵyn jańǵyrtý boıynsha jobalar da iske asýda», - dedi oblys ákimi Qyrymbek Kósherbaev kóshpeli otyrysta.

Aıta ketý kerek, Qyzylorda oblysy - memlekettik-jekeshelik áriptestikti damytý boıynsha elimizdegi bes úzdik aımaqtyń biri bolyp tabylady. Júzege asyrylatyn jobalar ekonomıkanyń barlyq salalaryn qamtıdy. Atap aıtqanda, olardyń qatarynda densaýlyq, dene shynyqtyrý jáne sport, turǵyn úı-kommýnaldyq sharýashylyǵy, bilim berý, tsıfrlandyrý, jolaýshylar kóligi jáne avtomobıl joldary, mádenıet, áleýmettik qamsyzdandyrý, qoǵamdyq tártip jáne ekologııa salalary bar.

Sonymen qatar, qazirgi ýaqytta aımaqta memlekettik-jekeshelik áriptestik aıasynda  18 kelisimshart jasalǵan. Onyń ishinde 10 medıtsınalyq dıspanser qurylysy, 4 sporttyq-saýyqtyrý keshenin jalǵa berý sekildi jumystar bar.

Kóshpeli otyrys barysynda aımaq basshysy jobalardy iske asyrý MJÁ jobalaryn tıimdi josparlaý týraly jalpy túsinik qalyptastyrýdy talap etetinin atap ótti.

«Memlekettik-jekeshelik áriptestik mehanızmin naqty ınvestorlar qyzyǵýshylyq tanytqan jobalardyń ınvestıtsııalyq tartymdylyǵyn arttyrý úshin ǵana paıdalaný kerek. Óıtkeni, jobalardy iske asyrý ınvestor úshin kiris deńgeıin qamtamasyz etip qana qoımaı, memleket tarapynan olarǵa tólenetin ótemaqy mólsherin barynsha azaıtýǵa, qajetsiz shyǵyndardy joıýǵa múmkindik beredi», - dedi oblys ákimi.

Sharada QR Densaýlyq saqtaý vıtse-mınıstri Oljas Ábishev, QR Bilim jáne ǵylym mınıstrliginiń Balalardyń quqyqtaryn qorǵaý komıtetiniń tóraǵasy Nurbek Orshýbekov,jáne ózge de azamattar taqyrypqa baılanysty oı-pikirlerin bildirdi

QR Parlamenti Senatynyń Áleýmettik-mádenı damý jáne ǵylym jónindegi komıtetiniń tóraıymy Birǵanym Áıtimova kezdesýdi qorytyndylady. «Biz memlekettik-jekeshelik áriptestik sheńberinde salynǵan birqatar balabaqshalardyń, nysandardyń jumysymen tanystyq. Áriptesterimizben birge Qyzylorda oblysyndaǵy bul tájirıbeni úzdik úlgi retinde respýblıka boıynsha engizý kerek dep oılaımyz», - dedi ol.