Qyzylordanyń kúrishi elordaǵa jetkiziledi

ASTANA. QazAqparat - Demalys kúnderi Qyzylorda oblysynan Astanaǵa kúrish jetkizile bastaıdy. «Dýman» OO, Q. Muńaıtpasov atyndaǵy stadıon (Kenesary kóshesi, 14) jáne B. Momyshuly dańǵylyndaǵy Oqýshylar saraıynyń janyndaǵy turaqtarda ótetin aýyl sharýashylyq jármeńkelerinde 1 kg úshin 175 teńgeden 20 tonna kúrish satylatyn bolady, dep habarlaıdy qala ákimdiginiń saıty.

Elordada áleýmettik mańyzdy taýarlardyń baǵasyn ustap qalý boıynsha júrgiziletin sharalar aıasynda Astana qalasy ákiminiń orynbasary Andreı Lýkın jáne Qyzylorda oblysy ákiminiń orynbasary Serik Qojanııazov ózara yntymaqtastyq týraly memorandýmǵa qol qoıdy.

Eske salaıyq, aýyl sharýashylyq jármeńkeleri «Dýman» OO, Q. Muńaıtpasov atyndaǵy stadıon (Kenesary kóshesi, 14) jáne B. Momyshuly dańǵylyndaǵy Oqýshylar saraıynyń janyndaǵy turaqtarda, Sh. Qudaıberdiuly kóshesi, 38 «Dastan» SÚ, №188 kóshe 14 úı jáne Prıgorodnyı turǵyn alabynda kún saıyn ótkiziletin bolady. Sonymen qatar, turǵyn úılerdiń aýlalarynda áleýmettik mańyzdy taýarlar satýǵa arnalǵan 50 oryn jasalady.

Munymen qosa, 30-31 shildede B. Momyshuly dańǵylyndaǵy Oqýshylar saraıynyń turaǵynda Almaty oblysy taýaróndirýshileriniń qatysýymen aımaqtyq jármeńke ótedi. Jármeńke barysynda 324 tonna ónim: taýyq eti, balyq, sút pen kókónis, bal jáne t.b. ónimder tómen baǵamen satylady.