Qyzylordanyń aýyl turǵyndary shybyn-shirkeıden teri aýrýynyń taralýyna alańdaýly
Áleýmettik jeli betterinde Jańaqorǵan aýdanynyń Túrkistan oblysymen shektesetin Kóktóbe, Qalǵansyr, Qandóz, Qashqankól, Qaratóbe eldi mekenderinde shybyn-shirkeı qaptap ketkeni aıtylǵan. Olardyń shaqqan jerinen adamdarda jara paıda bolyp jatqany jazylýda.
Oblystyq sanıtarııalyq-epıdemıologııalyq baqylaý departamenti mamandarynyń aıtýynsha, bul jaǵdaı keıingi 3-4 jyl kóleminde Syrdarııa ózeniniń sýy ulǵaıǵan kezde baıqalyp otyr. Darııaǵa jaqyn ornalasqan eldi mekenderde 10 kún shamasynda shybyn-shirkeı paıda bolady. Ol 1 aı merzim kóleminde qaıta joıylyp ketedi.
«Bul shybyn-shirkeıdiń leıshmanıoz aýrýyn tasymaldaý jaǵdaıy tirkelgen joq. Leıshmanıozdar qaýipti qansorǵyshtar arqyly taralady. Ol transmıssıvti parazıtarlyq aýrýlar tobyna jatady. Teri leıshmanıozdyń tabıǵı rezervýary kemirgishter – úlken qum tyshqany bolsa, ony moskıtter tasymaldaıdy. Oblysta moskıtterdiń birneshe túri kezdesedi. Olardyń ishinde leıshmanıoz aýrýdyń qozdyrǵysh parazıtin Rlasmodium Papatasi degen túri tasymaldaıdy. Teri leıshmanıozy aýrýynyń negizgi tabıǵı oshaǵy – Jańaqorǵan aýdanynyń Túrkistan oblysyna jaqyn ornalasqan eldi mekenderi.
Oblys kóleminde teri leıshmanıozy sońǵy ret 2003 jyly tirkelgen», - dedi oblystyq sanıtarııalyq-epıdemıologııalyq baqylaý departamentiniń bas mamany Saltanat Jaqypova.
Atalǵan syrqat ótken jyldyń qarasha aıynda 18 jyldan keıin alǵash ret tirkeldi. Qarasha-jeltoqsan aılarynda 3 jaǵdaı anyqtalsa, bıylǵy jyldyń úsh aıynda – 4 jaǵdaı (onyń ishinde 2-ýi Jańaqorǵan aýdanynda, 2-ýi Qyzylorda qalasynda).