Qyzylordalyqtar Denıs Tendi eske aldy

QYZYLORDA. QazAqparat - Qapyda qaza tapqan mánerlep syrǵanaýdan 2014 jylǵy Sochı Olımpıadasynyń qola júldegeri Denıs Tendi eske alý maqsatynda Qyzylorda qalasyndaǵy «Muz saraıynda» arnaıy shara ótkizildi. Oǵan qatysýshylar sańlaq sportshyny eske alyp, onyń qurmetine gúl shoqtaryn qoıdy, dep habarlaıdy QazAqparat tilshisi.

Syr óńiriniń turǵyndary Denıs Tenniń jarqyn beınesin saǵynyshpen eske alady. Qazaqstan mánerlep syrǵanaý ónerinde onyń qol jetkizgen bıigi erekshe. Búgingi kúnge deıin sporttyń atalmysh túrinen Olımpıada tórinde atoılap kózge túsken eshkim bolǵan joq.

Qyzylorda qalasynda ótken atalmysh shara barysynda jergilikti jurtshylyq osyndaı lebizderin bildirdi. Sońǵy jyldarda Syr óńirinde mánerlep syrǵanaý sporty damyp keledi. Sol jas órenderdiń sheberligin arttyrýǵa Denıs Ten aqyl-keńesin berip, únemi qoldaý bildirip júretin.

«Nebári 25 jasyna deıin tolaıym tabysqa kenelip úlgergen sańlaqtyń jarqyn isteri búgingi urpaqqa úlgi bolady. Onyń esimi jadymyzda máńgige saqtalady», - dedi №4 oblystyq olımpıadalyq rezerevtik mamandandyrylǵan balalar men jasóspirimder mektebiniń dırektory Alekseı Ilın.

Shara barysynda jergilikti jurtshylyq dańqty sportshynyń baǵyndyrǵan belesterin eshqashan umytpaıtynyn jetkizip jatty.