Qyzylordalyq jastar týǵan jerdi tanýǵa arnalǵan jobalardy qolǵa aldy
Bul jobalar Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy aıasynda qolǵa alynyp otyr.
«Jas Otan» jastar qanaty Qyzylorda oblystyq fılıalynyń tóraǵasy Álisher Qardashov jastardyń týǵan jer tarıhyn bilýge qyzyǵýshylyǵy zor ekenin atap ótti. Sondyqtan «Jas Otan» jastar qanaty oblystyq jastar resýrstyq ortalyǵymen birlese otyryp arnaıy jobany qolǵa alǵan.
«Syr óńirinde qazaq tarıhynda aıryqsha oryn alatyn tarıhı oryndar sany emes. Qasıetti topyraqta halqymyzdyń qadym zamannan bergi san alýan qupııasy syr búgip jatyr. Osyǵan baılanysty jastardy týǵan jer tarıhyn tanýǵa baǵyttalǵan ıgi isterge birge atqarýǵa shaqyrdyq. Osy baǵytta Jańaqorǵan aýdany aýmaǵyndaǵy Syǵanaq, Saýran qalalarymen tanysyp qaıttyq. Qazaq tarıhynda Syǵanaq qalasynyń alatyn orny erekshe. Ol - kezinde qypshaq dalasynyń aılaǵy atanǵan kıeli meken. Odan keıingi kezekte Aq ordanyń bas qalasy atandy», - deıdi ol.
Bıyl álemdi jaılaǵan pandemııa saldarynan birqatar jobalar kesheýildep qalǵan. Dese de, aldaǵy ýaqytta rýhanı jańǵyrý baǵytyndaǵy mańyzdy jobalar jalǵasyn tabady.
«Endigi kezekte tarıhı qalalarmen tanysý jobasyn Qazaly jáne Aral aýdandarynda jalǵastyrýǵa mán beremiz. Máselen, Qazaly aýdanynda oǵyz astanasy bolǵan Jankent shahary jatyr. Aral aýdanyndaǵy Aral teńizi aýmaǵynda da qanshama jádigerler bar. Bul jobalar oblystyq jastar resýrstyq ortalyǵymen birge júzege asyrylady», - deıdi Á. Qardashov.