Qyzylordalyq jastar «Qazaqstandaǵy 100 jańa esim» jeńimpazdarymen kezdesti

QYZYLORDA. QazAqparat - Qyzylordalyq jastar «Qazaqstandaǵy 100 jańa esim» jeńimpazdarymen kezdesti. Olardyń qatarynda qyzylordalyq kásipker Aıdos Saılyǵaraev, pedagog, psıholog, aýdarmashy Symbat Ábdirahmanova jáne Almaty oblysynan kelgen aqyn Maqpal Mysa bar, dep habarlaıdy QazAqparat tilshisi.

Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy aıasynda júzege asyrylyp jatqan jobaǵa qatysýshylar qatary kóbeıip keledi. Syr óńirinen atalmysh arnaıy jobaǵa 2017 jyly 68 úmitker qatysty. Nátıjesinde sol jyly dáriger Bolatbek Baımahanov, selektsıoner-ǵalym Aleksandr Podolskıh, toǵyzqumalaqtan álem chempıony Ásel Dalıeva, pedagog, psıholog, aýdarmashy Symbat Ábdrahmanova jeńimpaz atandy. Al 2018 jyly oblystan 82 úmitker qatysyp, halyqaralyq áskerı fotojýrnalıst Nazgúl Kenjetaı, kásipker Aıdos Saılyǵaraev jeńis tuǵyrynan kórindi.

Júzdesý TedTalks formatynda kezdesý ótti. Halyqaralyq «Parasatty poezııa» festıvaline kelgen Maqpal Mysa jastarǵa aqyndyq óner jaıly oılarymen bólisip, bilim básekesinde ozyq bolýǵa shaqyrdy.

«Men únemi jastarmen kezdesýge asyǵyp turamyn. Sóz - adam janynyń emi. Sózdiń qudireti bolsa kerek, elge óleń arqyly tanyldym. Óleń - meniń taǵdyrym, jetistikke jetkizdi. Sondyqtan da sizderge aıtarym, tabıǵat bergen talantty barynsha baptap, ony damytý bilý kerek. Sonda ǵana siz tabysty bolasyz. Úsh jyl qatarynan joǵary oqý ornyna túse almadym. Bar maqsatym ata-anama salmaq salmaı, jýrnalıstıka mamandyǵy boıynsha memlekettik grant ıegeri ataný boldy. Ókinishke oraı, jýrnalıstıka fakýltetine túse almaı, T.Júrgenov atyndaǵy Óner akademııasynyń kıno jáne televızııa mamandyǵyn támamdadym. Oqýǵa túsem degenshe, meniń óleńderim birneshe jyr jınaqqa enip, birneshe ret músháırada jeńimpaz atandym. Qazir aýdarmamen de aınalysamyn. Men bul jetistigime tynymsyz izdenis pen eńbektiń arqasynda armanyma qol jetkizdim. Jýrnalıstıka salasynda eńbek etip kelemin. Sondyqtan sizderge de osyndaı tabandylyqty tileımin», - dedi Maqpal Mysa.

Aıdos Saılyǵaraev - Qyzylorda óńirinde alǵashqy kondıter ónimderin daıyndaıtyn dúkender jelisiniń negizin qalaýshy kásipker. Qazirgi tańda «Braýnıs» kondıter dúkender jelisiniń ónimderin Syr óńiri jurtshylyǵy joǵary baǵalaıdy. Kezdesýde A.Saılyǵaraev óz kásibin ashyp, jastardy turaqty jumyspen qamtý, kásibı sheberlik máseleleri boıynsha tájirıbesimen bólisti.

«Qazaqstandaǵy 100 jańa esim» arnaıy jobasynyń alǵashqy kezeń jeńimpazy Symbat Ábdirahmanova birneshe tildi meńgergen, pedagog-psıholog. Ol qazirgi tańda UNISEF-tiń jasóspirimder arasyndaǵy sýıtsıdtiń aldyn alý jobasy boıynsha birneshe ǵylymı maqalalar jazyp, ádistemelik qural daıyndaǵan. Sondaı-aq, aımaqta mektep bitirýshilermen túrli psıhologııalyq trenıngter ótkizip, jasóspirimder arasyndaǵy qylmystyq oqıǵalardyń aldyn alýǵa kómektesip keledi.

Symbat eshqandaı qarjy qajet etpeıtin mýltfılmder daıyndaýmen aınalysady. Ásirese til múkistigi bar balalarǵa arnalǵan mýltfılmderin mamandar sabaq barysynda paıdalanyp júr. Ol 2018 jyly Qyzylorda qalasynyń 200 jyldyq mereıtoıyna arnap, «Sıqyrly kilt» serııaly mýltfılmin daıyndady. Budan bólek, Symbattyń birneshe mýltfılmderi oblystyq telearna, respýblıkalyq «Balapan» telearnasynan berilýde. S.Ábdirahmanova jastarǵa maqsat qoıý, armandaı bilý, jetistikke jetýge baılanysty óz tájirıbesimen bólisti.

«Adamnyń armany naqty bolýy kerek dep oılaımyn. Óıtkeni men únemi naqty nárselerdi armandap, ony maqsatyma aınaldyrdym. Ómirimde parsy tilinde qaı eldiń sóıleıtin bilmeıtin jasymda osy tildiń mamany bolý úshin memlekettik grant ıegeri atandym. Qazirgi tańda parsy tili boıynsha elimizdegi sanaýly aýdarmashylardyń qataryndamyn. Jastarǵa aıtarym, sizder eshqashan óz armanyńyzǵa jetý úshin jalyqpaı eńbek etýden sharshamańyzdar. Maqsatqa jetý jolynda túrli qurbandyqqa barýǵa týra keledi. Qydyrýdan bas tartyp, toılarǵa barmaı qalýyńyz múmkin. Esesine qoǵamǵa paıdaly is jasaıtynyńyzdy umytpańyz.

Osy joba jeńimpazdarynyń ishinde 18-19 jasar jigitter bar. Olardyń jetistikterin kórgende, meniń osy ýaqytqa deıin bos ketken ýaqytymdy oılap ókindim. Sondyqtan adam ómiriniń kóktemi sanalatyn jastyq shaǵyńyzdy ókinbesteı ótkizińizder», - dedi Symbat Ábdirahmanova.

Kezdesýge qatysqan Eraly Arýjan joba jeńimpazdarynyń jetistik joly kóp oı salǵanyn jetkizdi.