Qyzylordalyq jas ónertapqyshtar «aqyldy» jylyjaı qurastyrdy
Qyzylorda qalasyndaǵy N.Nazarbaev zııatkerlik mektebinde bilim alatyn oqýshylar Toǵjan Marat pen Juldyzaı Muńaıtpasova aımaqta kókónis baǵasyn arzandatý máselesine nazar aýdardy. Bul maqsatta «aqyldy» jylyjaı qurastyrý isine mán berdi. Bul ózge aımaqtan tasymaldanatyn aýyl sharýashylyǵy ónimderiniń kólemin azaıtýǵa septigin tıgizedi.
Jas ónertapqyshtar ázirge keshenniń shaǵyn modelin jasap shyqty. Alǵashqy ónim jınaýǵa da úlgerdi. Osy baǵytta oqýshylar 1,5 jyldaı ýaqytyn sarp etti. Alǵashqyda tek qaǵaz júzinde jasalǵan joba búginde is júzinde kádege jarap jatyr. Jas ónertapqyshtar qazir shalǵyn men jalbyzdy ósirip, odan mol ónimge negiz qalaýǵa bolatynyna kóz jetkizdi. Sol arqyly avtomatty qurylǵylardyń kómegimen mol ónim jınaýǵa jol ashylady.
«Jumys barysynda barlyǵyn qadaǵalap otyrýǵa ábden bolady. Atap aıtqanda, temperatýra nemese ylǵaldylyq tómendep nemese tym joǵary bolsa, ony nazardan tys qaldyrýǵa bolmaıdy. Mundaı aýytqý dıspleıde kórsetiledi. Bul qurylǵy topyraqtyń da ylǵaldylyǵyn qansha mıllılıtrge deıin aıqyndaıdy. Ár tamshy sý men aýanyń kúıin baqylaıtyn qurylǵylar kúnnen qýat alady. Bastysy, shyǵynnyń bolmaýyna kóńil bóldik. Aıta keterligi, osyndaı oń ister arqyly ónim óndirý arzanǵa túsedi», - dedi Toǵjan Marat.
Bıologııa pániniń muǵalimi Raıhan Táji shákirtteri jasaǵan jobanyń tıimdiligin atap ótti. Sol arqyly avtomatty túrde jańa tehnologııamen jumys isteýge jol ashylady.
«Jylyjaıdaǵy qurylǵylar kómirqyshqyl gazyn avtomatty túrde anyqtaıdy. Túrli aýytqýǵa jol berilgen jaǵdaıda avtomatty túrde olar ózdiginen sónip qalady. Joba barysynda sondaı jaǵdaılar qarastyrylýda. Tehnologııa smartfon arqyly basqarylady», - dedi Raıhan Táji.
Shaǵyn model kúıindegi jylyjaı jaqyn kúnderi Toǵjan men Juldyzaı bilim alatyn mektep aýlasynan boı kóteredi. Ol polıkarbonat materıalynan jasalady. Onda dárýmenge toly jemister men kókónisterd ósiriledi.
Budan buryn qyzylordalyq oqýshylar 10-nan astam aýrý túrin anyqtaıtyn qurylǵy oılap tapty.