Qyzylordalyq jas ónerpazdar dástúrli án jáne kúı oryndaýda synǵa tústi

QARMAQShY. QazAqparat - Qyzylorda oblysynyń Qarmaqshy aýdanynda «Qorqyttan qalǵan qońyr ún» atty balalar shyǵarmashylyǵynyń óńirlik baıqaýy ótti, dep habarlaıdy QazAqparat tilshisi.

Atalmysh shara Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy aıasynda uıymdastyryldy. Baıqaýǵa Qarmaqshy aýdany ákimdigi qoldaý kórsetti. Ony ótkizýge aýdandyq mádenıet jáne tilderdi damytý bólimine qarasty K.Rústembekov atyndaǵy «Jyraýlar úıi» uıytqy boldy. Qatysýshylar dástúrli án-jyr jáne kúı ónerleri janry boıynsha baq synady.

Óner báıgesine Aral, Qazaly, Syrdarııa jáne Shıeli aýdandarynan barlyǵy 25 talapker qatysty. Qazylar alqasynyń quramynda jyraý, «Mádenıet salasynyń úzdigi» Maıra Sársenbaeva, kúıshi, oblystyq fılarmonııanyń ártisi Abylaı Ysqaqov, halyqaralyq «Qazaq tili» qoǵamynyń aýdandyq fılıalynyń tóraıymy Kúljaýhar Raeva boldy.

Qazylar alqasynyń sheshimimen dástúrli kúı janry boıynsha qarmaqshylyq Aısholpan Amantaı bas júldege ıe boldy. Dástúrli jyr janrynda kishi top boıynsha Abylaı Qunanbaıuly, úlken top boıynsha araldyq Jansaıa Faızýllaqyzy bas júlde aldy.

Buǵan deıin «Bolashaqqa baǵdar: rýhanı jańǵyrý» baǵdarlamasy aıasynda Shıelide belgili jyraý, QR mádenıet qaıratkeri Qurmanbek Bekpeıisti eske alý keshi ótken bolatyn.