Qyzylordalyq órender atqa miný mádenıetimen tanysty

QYZYLORDA. QazAqparat - Qyzylorda oblysy Jańaqorǵan aýdanyna qarasty Talap aýylynda oryn tepken «Taldysý» lagerinde «Atqa miný mádenıeti» taqyrybynda tanymdyq shara ótkizildi, dep habarlaıdy QazAqparat tilshisi.

Bul tanymdyq shara Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» jáne «Uly dalanyń jeti qyry» maqalalary aıasynda qolǵa alyndy. Ony oblystyq «Rýhanı jańǵyrý» ortalyǵy jáne oblystyq dene shynyqtyrý jáne sport basqarmasy uıymdastyrdy.

«Tuńǵysh Prezıdent - Elbasy «Uly dalanyń jeti qyry» maqalasynda «Atqa miný mádenıeti men jylqy sharýashylyǵy jer júzine Uly daladan taraǵany tarıhtan belgili. Elimizdiń soltústik óńirindegi eneolıt dáýirine tıesili Botaı qonysynda júrgizilgen qazba jumystary jylqynyń tuńǵysh ret qazirgi Qazaqstan aýmaǵynda qolǵa úıretilgenin dáleldedi. Jylqyny qolǵa úıretý arqyly bizdiń babalarymyz óz dáýirinde adam aıtqysyz ústemdikke ıe boldy. Al jahandyq aýqymda alsaq, sharýashylyq pen áskerı saladaǵy teńdessiz revolıýtsııaǵa jol ashty. Jylqynyń qolǵa úıretilýi atqa miný mádenıetiniń de negizin qalady», - deıdi oblystyq «Rýhanı jańǵyrý» ortalyǵy «Aqparat tolqyny» bóliminiń mamany Janar Ergenbaıqyzy.

Shara barysynda jas órender at ábzelderimen tanysyp, onyń ornalasý rettiligin tamashalady. Artynsha saıgúliktiń qulaǵynda oınaıtyn shabandozdardyń oıyndaryn tamashalap, tánti boldy. Shabandozdyń biri at ústinde sadaq tartyp, nysanaǵa dóp tıgizse, endi biri jylqy ústinde julmalasa kúresip, aýdaryspaq oıynyn kórsetti. Sondaı-aq lager tynyǵýshylary jylqy janýarymen jaqyn tanysyp, atqa miný ádebin uǵyndy.

Ulttyq oıyndy ulyqtaǵan shara sońynda «Rýhanı jańǵyrý» ortalyǵy ókilderi uıymdastyrýshylardy alǵys hatpen marapattady.

Budan buryn Qyzylordada kúıshiler baıqaýy ótken bolatyn.