Qyzylordalyq ónertapqyshtar sadaq atýdyń onlaın nusqasyn jasady
Mundaı kompıýterlik oıyn Qyzylordada alǵash ret jasalyp otyr. Jergilikti Abylaıhan kolledjinde oqıtyn Abylaıhan Qarsaqbaı, aǵaıyndy Sultan men Bek Qazı osylaısha jańashyl isimen ózderin jaqsy qyrynan tanyta bildi. 3D úlgisinde ázirlengen týyndy mamandar tarapynan joǵary baǵaǵa ıe boldy. Bul oıyndy daıyndaýǵa olardyń 4 aıǵa jýyq ýaqyty ketken.
«Qazir ınternet arqyly kóptegen oıyndardy kórýge bolady. Oǵan qumar jas órender kóp. Dese de onda qazaqtyń uǵymyna saı keletini saýsaqpen sanarlyq. Tipti, joq desek te bolady. Meni jáne birge oqıtyn dostarymdy osy másele oılandyratyn. Oılasa kele bir sheshimge keldik. Ulttyq oıyndardy jasaýǵa nazar aýdarǵandy jón kórdik. Jańa jobamyz osylaısha ómirge endi. Ony jasaý barysynda barlyq usaq-túıekti umyt qaldyrmaýǵa tyrystyq. Maqsatymyz óz nátıjesin berdi. Sadaq tartý oıyny kórgen adamdardy ózine baýraı tústi. Osy salada jemisti eńbek etip júrgen jergilikti ǵalymdar men mamandardyń aqyl-keńesine qulaq túrdik. Olar ózderiniń joǵary baǵasyn berdi», - dedi Abylaıhan.
Jas ónertapqyshtyń aıtýynsha, kompıýterlik oıyndy jasaý arnaıy baǵdarlamalar boıynsha ázirlengen. Bul baǵytta oıyndardy óńdeý quraly paıdasyn tıgizdi.
«Búginde ony kompıýterdegi vırtýaldy oıyndar tizimine engizý baǵytynda tıisti is-sharalar júrgizip jatyrmyz. Onyń óz talaptary bar. Álemde bul baǵytta qyzmet atqaryp jatqan kompanııalar bar. Biz sol kompanııalar arqyly óz jobamyzdy keńinen nasıhattaýǵa kóńil bóldik. Biz tek sadaq tartýmen ǵana shektelip qalǵymyz kelmeıdi. Alda úlken jobalar kútip tur. Endi sol baǵytta jumys júrgizsek degen oıymyz bar. Atap aıtqanda, toǵyzqumalaq, asyq atý, kókpar sekildi qazaqtyń ulttyq oıyndaryn nasıhattaý josparda bar. Osylaısha kompıýter men uıaly telefonǵa úńilgen jastarǵa sol arqyly ulttyq oıyndardy úıretsek deımiz. Olardy VR ǵana emes, kompıýterge de, uıaly telefonǵa da shyǵarý oıymyzda bar», - dedi Abylaıhan.
Qazirgi tańda kolledjde esepteý tehnıkasy jáne baǵdarlamalyq qamtamasyz etý mamandyǵy boıynsha bilim alyp jatqan jastar arasynda túrli jobalardy júzege asyryp júrgen ónertapqysh órender barshylyq.
Atap aıtqanda, Serjan Jumajanov kolledj stýdentterine arnalǵan Telegram-bot baǵdarlamasyn jasaý ústinde. Al, bir top stýdentter «Múmkindigi shekteýli balalarǵa arnalǵan» oıynshyq qurastyrýǵa kóńil bólip otyr.