Qyzylordalyq oqýshylar Qorqyt ata keshenine bardy
Atalmysh shara Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy aıasynda ótkizildi.
Qyzylordalyq jas órender «Kıeli jerlerdiń geografııasy» jobasy aıasynda Qarmaqshy aýdanynda oryn tepken Qorqyt Ata memorıaldyq murajaıyndaǵy qundy jádigerler men keshen aýmaǵyndaǵy soqqan jelmen úndesken qobyz eskertkishin kózben kórdi. Olar qazaq mıfologııasyndaǵy Kók táńiriniń oljasy men teris kúshterden qorǵaýshy sımvoly sanalatyn qoshqar músinin, kóne Rım dáýirindegi arhıtektýralyq qurylys úlgisinde salynǵan amfıteatrdy tamashalady.
Sondaı-aq, túrki jurtynyń ortaq abyzy Qorqyt Ata ómir súrgen dáýirdiń tarıhy men mádenıeti jaıly aýqymdy málimetter men ańyz áńgimelerge qanyq boldy. Aýdandyq jyraýlar úıiniń ónerpazdarynyń ónerin tamashalady. Qarmaqshy aýdandyq jastar resýrstyq ortalyǵy jáne «Qarmaqshy jastary» jastar qoǵamdyq birlestiginiń uıymdastyrýymen ótkizilgen vıktorınalyq oıyndarǵa belsene qatysty.