Qyzylordalyq muǵalim qazaqtildi matematıka saıtyn jasap shyǵardy

NUR-SULTAN. QazAqparat - Qyzylorda qalasyndaǵy Nazarbaev Zııatkerlik mektebiniń muǵalimi Muhtar Begaıdarov mektep oqýshylary men muǵalimderge arnap matematıkalyq saıt shyǵardy, dep habarlaıdy QazAqparat NZM baspasóz qyzmetine silteme jasap.

Saıt avtorynyń aıtýynsha, mundaı ıdeıa eki jyl buryn oıyna kelgen. Buǵan eń birinshi kezekte qazaq tilindegi materıaldardyń jetispeýshiligi sebep bolǵan eken. Osyny baıqaǵan Muhtar matematıka páninen oqýlyqtardyń elektrondy nusqalaryn bir veb-paraqqa jınaqtaýdy qolǵa alǵan.

«Aldymen 600-den astam kitap, vıdeo-oqýlyqtar, ǵylymı maqalalar jáne taqyryptyq teorııalyq materıaldar júkteldi. Keıin áriptesterimniń keńesi boıynsha onlaın-platformany túrli resýrstarmen jáne quraldarmen tolyqtyrdym. Saıtta ádistemelik nusqaýlyqtan basqa, qorytyndy emtıhanǵa daıyndalýǵa arnalǵan ártúrli test tapsyrmalary bar», - deıdi Muhtar Begaıdarov.

Sonymen qatar, pán boıynsha bilimdi tekserýge arnalǵan olımpıadalyq bólim ashylǵan.

«2018 jyldan bastap saıtty «NISmath» dep atadym. Ótken jylǵy túlek Arman Álisher saıt logotıpin jasaýǵa kómektesti. Taǵy bir oqýshym - Nurbol Bıjigit onyń mobıldi nusqasyn ázirledi»,- deıdi ol.

Oqyrmandar men saıt paıdalanýshylar geografııasy kún saıyn artyp keledi. Alǵashqy jyldary platformany 1000-ǵa jýyq adam qoldansa, bıyl bir ǵana aıdyń ishinde júıe 23000 belsendi qoldanýshyny tirkedi.

«Saıt óte qoljetimdi jáne zamanaýı bilim berý baǵdarlamasyna beıimdelgen. Barlyq resýrstar - tegin, bul paıdalanýshylar úshin óte mańyzdy. Men óz tájirıbemde oqýlyqtardy, tapsyrmalardy jıi qoldanamyn. Sabaqtarda saıttyń qosalqy qosymshalaryn paıdalanamy», - deıdi Túrkistan oblysyndaǵy aýyl mektebiniń muǵalimi Jazıra Balabı.

Búginde «NISmath» kómegine elimizdiń pedagogtary men oqýshylary júginedi.

Muhtardyń bul avtorlyq jobasyn paıdalanýshylar ǵana emes, sonymen qatar muǵalimder arasynda ótkiziletin dástúrli respýblıkalyq bilim saıysynyń sarapshylary da joǵary baǵalady. Pedagogıkalyq ıdeıalar festıvaliniń «Sheberlik palıtrasy» bóliminde «nismath.org» ınternet-platformasy áriptesterdiń úlken qyzyǵýshylyǵyn týdyrdy, al jobany qorǵaǵan kezde qatysýshylardyń 100 paıyzy platformanyń belsendi qoldanýshylary bolyp shyqty. Baıqaý nátıjesinde M.Begaıdarovtyń matematıkalyq saıty taratýǵa jáne tájirıbede qoldanýǵa laıyqty úzdik ıdeıa dep tanyldy.

Aıta ketý kerek, Muhtar Begaıdarov – bos ýaqytynda óz bastamasy boıynsha mektep oqýshylary men muǵalimderge jańa bilimdi meńgerýge jáne matematıkany baǵyndyrýǵa kómektesetin Syr óńirindegi eń tanymal eriktilerdiń biri.