Qyzylordalyq medıtsına mekemelerine avtokólik kilti tapsyryldy

  QYZYLORDA. QazAqparat - QR Tuńǵysh Prezıdenti kúninde Qyzylorda qalasynda medıtsınalyq mekemelerge arnaıy avtotehnıkanyń kilti tapsyrylyp, «112» biryńǵaı dıspetcherlik qyzmetiniń tusaýy kesildi, dep habarlaıdy QazAqparat.

Oblystyń medıtsına mekemelerine mamandandyrylǵan 7 reanımobıl, 15 «Largýs» jáne 37 «ÝAZ» avtokóliginiń kilti tabystaldy.

Aımaq basshysy Qyrymbek Kósherbaev densaýlyq saqtaý salasy qyzmetkerlerin quttyqtap, Elbasy N.  Nazarbaev árbir Joldaýynda adam kapıtalyn damytýda halyqtyń densaýlyǵyn nyǵaıtýdyń mańyzyn atap ótetinin aıtty. Máselen, bıylǵy Joldaýda Memleket basshysy Úkimetke 5 jyl ishinde densaýlyq saqtaý salasyna barlyq kózderden jumsalatyn qarajatty ishki jalpy ónimniń 10 paıyzyna deıin jetkizý qajettigin tapsyrdy, bul osy salanyń halyqaralyq deńgeıde damýyna múmkindik beredi.

«Densaýlyq saqtaý - aımaǵymyz úshin qashanda mańyzdy salalardyń biri. Sońǵy 5 jylda respýblıkalyq jáne oblystyq bıýdjet qarajaty esebinen apatty dep tanylǵan  medıtsınalyq nysandardyń 64 paıyzyn jańadan salýǵa múmkindik jasadyq. Sonyń ishinde Aral, Qazaly, Shıeli aýrýhanalary bar. Sondaı-aq, Jalaǵash aýdanynda ortalyq aýdandyq aýrýhana qurylysyn qarjylandyrý máselesi sheshilip, qurylys aqpan aıynda bastalady. Medıtsına salasyna  memlekettik-jekemenshikti áriptestikti tartyp, 61 jobany qarastyryp otyrmyz, bul respýblıka boıynsha úzdik kórsetkish. Densaýlyq saqtaý salasynda kadrlar daıarlaýǵa oblys ákiminiń granttary bólindi, qazir 72 bakalavr men rezıdent elimizdiń medıtsınalyq JOO-da bilim alýda. Bizdiń dárigerler birneshe aı boıy Koreıa, Reseı Federatsııasynyń klınıkalarynda bilimin jetildirdi», - dedi aımaq basshysy.

Qyzylorda oblysy ákiminiń orynbasary Evgenıı Kım jedel-járdem, polıtseı, tótenshe jaǵdaılar, órt sóndirý, gazben qamtý, anyqtama qyzmeti biriktirilgen «112» biryńǵaı kezekshi dıspetcherlik qyzmetiniń jobasyn tanystyrdy. 
 

Jol kólik oqıǵasy kezinde jaraqattan keıingi ólim-jitimdi azaıtý maqsatynda jergilikti polıtsııa qyzmetiniń 400-ge jýyq jol-patrýl polıtsııa qyzmetkeri jaraqat alǵan naýqastarǵa alǵashqy medıtsınalyq kómek kórsetý qaǵıdattary boıynsha oqýdan ótti. Sonymen qatar, jergilikti polıtsııa qyzmetiniń jol boıyndaǵy 30 brıgadasyna zardap shekkenderge alǵashqy medıtsınalyq kómek kórsetýge arnalǵan dári-dármek qobdıshasy berildi.

Aımaqta barlyǵy 75 brıgada, arnaıy sanavıatsııa tehnıkasy jáne biryńǵaı medıtsınalyq Sall-ortalyq jumys isteıdi. Nátıjeli reanımatsııa kórsetkishi 2 ese jaqsaryp, aýrýhanaǵa deıingi ólim jaǵdaılary 2,9% tómendegen.