Qyzylordalyq maıdangerler «Máskeý úshin shaıqasqa - 75 jyl» tósbelgisimen marapattaldy
Saltanatty sharada «Máskeý úshin shaıqasqa - 75 jyl» tósbelgisi syrboıylyq eki ardagerge taǵyldy. Al, soǵys ardageri Keńesbaı Qalıevtiń densaýlyq jaǵdaıyna baılanysty merekelik medal úıinde tabystaldy. Bul týraly QazAqparat HAA tilshisi oblystyq Qazaqstan halqy Assambleıasyna silteme jasap habarlady.
Sharaǵa oblys ákiminiń orynbasary Rýslan Rústemov, oblystyq Qazaqstan halqy Assambleıasynyń ókilderi, barlyq etnomádenı birlestiktiń, oblystyq ardagerler keńesiniń músheleri, M.Mámetova atyndaǵy gýmanıtarlyq kolledj stýdentteri jáne BAQ ókilderi qatysty.
Oblys ákiminiń orynbasary alǵy sózinde «Soǵystyń ot maıdanynda tolarsaqtan qan keshe júrip, elge jeńimpaz retinde oralǵan babalarymyzdyń erligi aldynda taǵzym etip bas ıemiz. Maıdan keshti soǵysta júzdegen qyzylordalyq batyrlar jeńis úshin kúresti. Ókinishke oraı olardyń kóbi elge qaıta oralmady. Búgin mine, Máskeý úkimetiniń sheshimimen tósbelgi ortamyzda otyrǵan ardaqty aqsaqaldarymyzǵa taǵylady», - dedi.
Alekseı Demın Uly Otan soǵysy ardagerlerine «Biz máńgi birgemiz, birligimiz bekem, sondyqtan bizdi eshkim jeńe almaıdy» dep, keýdelerine «Máskeý úshin shaıqasqa - 75 jyl» tósbelgisin taǵyp, marapattady.
Jalpy, bul tósbelgi 2016 jyldyń shilde aıynan berile bastady.
Uly Otan soǵysynyń ardageri Bóribaı Qulmanov kórsetilgen iltıpattylyq úshin alǵysyn aıtyp, batasyn berdi.
Saltanatty sharada Uly Otan soǵysyndaǵy keńes áskeriniń jeńisi álemge beıbitshilik syılaǵandyǵy, keńes áskeriniń jaýyngerleri Máskeý qalasyn jaýdan qorǵaýda erekshe erlik kórsetkendigi, jaýyngerler nemis fashısterine qarsy soǵysyp, Máskeýdi jaýdyń qolynan aman alyp qalǵandyǵy týraly áńgime órbidi. Sondaı-aq, el batyrlaryn ulyqtaý maqsatynda ótkizilgen kezdesýde oblys ákiminiń orynbasary R.Rústemov Reseıdiń Almatydaǵy bas konsýlyna alǵysyn bildirdi.