Qyzylordalyq qaıyrymdy azamattar betperdeni turmysy tómen otbasylarǵa tegin taratýda
Betperde tigý isin «Qolóner» ulttyq naqysh ortalyǵynyń mamandary qolǵa aldy. Ortalyq basshysy Aıda Kerimqulovanyń aıtýynsha, bul ıgilikti iske «Abzal jáne K» tolyq seriktestigi (basshysy Maǵjan Erálıev) men «Abaı Dáýlet» JShS (basshysy Murat Sársenbaev) qoldaý bildirgen. Nátıjesinde qazir ortalyqtaǵy tiginshiler barlyq talaptardy saqtaı otyryp, qajetti betperde tigý isin jolǵa qoıdy.
«Osyndaı syndarly sátte bir-birimizge qoldaý bildirip, janymyzda júrgen jandarǵa demeý kórsetý – basty paryzymyz bolýy tıis. Álem jurtshylyǵyn alańdatyp otyrǵan qaýipti indetten saqtaný joldaryn barlyǵymyz saqtaýymyz kerek. Eleń-alań shaqta bir-birimizge qol ushyn sozyp jatsaq, ol bizdiń halqymyzdyń dalasyndaı keń darhan peıilin kórsetedi emes pe? Oblystyq kásipkerlik palatasy janynda óńirlik damý keńesi bar. Oǵan jergilikti kásipkerler múshe bolyp qabyldanǵan. Biz bul joba jóninde áriptesterimizben aqyldastyq. Sol arqyly naqty sheshim qabyldandy. Igilikti isti osylaısha qolǵa aldyq. Búginde tiginshiler halyqqa qajetti betperdeni tigý isin tolyq júzege asyrýǵa mamandandy. Ortalyqta tigilgen betperdeni qalanyń shetki aımaǵynda turatyn jaǵdaıy tómen otbasylarǵa, «Atameken» otbasylyq úlgidegi balalar úıi tárbıelenýshilerine, ekiqabat áıelderge, qart kisilerge tegin berý arqyly óz oıymyzdy júzege asyrýǵa múmkindik aldyq. Buǵan «Atameken» QUP jáne kásipkerler palatasynyń bólim basshysy Gaýhar Eleýsinova tarapynan qoldaý jasalǵanyn aıta ketkenimiz durys», - dedi Aıda Kerimqulova.
Ortalyq basshysy aldaǵy ýaqytta bul joba aýqymyn keńeıtý jóninde usynys bildirip otyr. Qazir álemdi jaılaǵan qaýipti koronvırýs dertiniń aldyn alý baǵytynda barlyǵymyz jumyla jumys jasaýymyz tıis. Sonda kez-kelgen qıyndyqtan shyǵýǵa múmkindik bar.
«Aldaǵy ýaqytta betperdemen qamtamasyz etý baǵytynda taksı júrgizýshilerin, qoǵamdyq avtobýs shoferlerin qamtamasyz etýge nazar aýdarý oılastyrylǵan. Árıne, bul jobany júzege asyrýǵa barlyq janashyr azamattar men kásipkerler qoldaý bildirse degen usynysym bar. Sol arqyly balabaqshadaǵy búldirshinderdi de aldyńǵy kezekte qamtýǵa kóńil bólinedi», - dedi ortalyq basshysy.