Qyzylordalyq kásipkerlerdiń 2 myńnan astam jobasy qoldaý tapqan

QYZYLORDA. QazAqparat – Bıyl Qyzylorda oblysyna 424 mlrd teńge kóleminde ınvestıtsııa tartylady. Bul týraly oblys ákimi Nurlybek Nálibaev Qyzylorda óńir máslıhatynyń kezekti V sessııasynda málim etti, dep habarlaıdy QazAqparat.

Jyl basynan kásipkerlikti qarjylaı qoldaý úshin ártúrli kózderden 23 mlrd teńgege jýyq qarjy qarastyrylyp, 2 myńnan astam jobaǵa qoldaý kórsetildi.

«Kásipkerlikti damytý jónindegi ulttyq joba» sheńberinde jyl basynan nesıe portfeli 14 mlrd teńgeni quraıtyn 484 joba sýbsıdııalandy. Jumys jasap turǵan shaǵyn jáne orta kásipkerlik sýbektileriniń sany 72 872 birlikti qurap, 35,6% artty. Memleket basshysynyń tapsyrmasymen bıyl bastalǵan jas kásipkerlerge jyldyq 2,5 paıyzdyq jeńildikpen kredıt berý jumystary aıryqsha qoldaý tapty. Respýblıkalyq bıýdjetten 1 mlrd 285 mln teńge qarjy bólindi. Ótinimder óńirlik bıznes jobalardy irikteý jónindegi konkýrstyq komıssııada qaralyp, 264 jas kásipker oń qorytyndy aldy. Al 172 jas kásipker óz kásibin bastady», - dedi aımaq basshysy.

Jas kásipkerlerdiń bastamalaryn qarjylaı qoldaý maqsatynda oblys ákimdigi Eńbek jáne halyqty áleýmettik qoldaý mınıstrligine taǵy 200 adamǵa 1 mlrd teńge qarjy bólý usynysymen shyǵyp, usynys qoldaý tapty. Bólingen qarjy jyl aıaǵyna deıin óz maqsatyna baǵyttalady.