Qyzylordalyq bıshiler halyqaralyq mádenı festıvalge qatysady
22:44, 29 Qarasha 2018
QYZYLORDA. QazAqparat - Syr óńiriniń «Tomırıs» bı ansambli Birikken Arab ámirliginde ótetin halyqaralyq mádenı festıvalge qatysady, dep habarlaıdy QazAqparat tilshisi.
Mádenı festıval 1 jeltoqsanda bastalady. Ony BAÁ Prezıdenti, sheıh Halıfa ben Zaıd ál-Nahaıan atyndaǵy gýmanıtarlyq uıym uıymdastyryp otyr.
«Tomırıs» bı ansambli 2001 jyly qurylǵan. Alǵash ashylǵan kezde bı tobynyń quramynda bar-joǵy 4 ónerpaz ǵana boldy. Qazir olardyń sany otyzǵa jýyq. Ansambl Qyzylorda oblysyndaǵy birden-bir kásibı óner ujymy sanalady.
«Tomırıs» bı ansambli burynnan halyqaralyq baıqaýlarda baq synap keledi. 2016 jyly ansambl TÚRKSOI halyqaralyq uıymynyń shaqyrtýymen Túrkııada bolyp, túbi bir túrki jurtynyń Naýryz merekesine qatysyp, óner kórsetken bolatyn.