Qyzylordalyq bankomatta umytyp ketken aqshany ıesine qaıtardy

QYZYLORDA. QazAqparat - Qyzylorda qalasynyń turǵyny Qarlyǵash Myhanova bankomatta qomaqty aqshasyn qaldyryp ketken jerlesiniń aqshasyn túgeldeı qaıtaryp berdi, dep habarlaıdy QazAqparat tilshisi.

Ol tańerteń «Qyzylorda» sýpermarketininiń ishinde ornalasqan bankomatqa aqsha alýǵa keledi. Onda bankomat aldynda qomaqty aqshanyń jatqanyn kózi shaldy. Qarlyǵash bul aqshany ıesine qaıtarýǵa sheshim qabyldaıdy. Osy maqsatta áleýmettik jelige aqshany ıesine qaıtarý maqsatynda habarlandyrý jarııalaıdy.

«Ómirde túrli jaǵdaı bolady. Belgisiz bireýdiń bankomatta aqshasyn umytyp ketkeni meni oılandyryp tastady. Sol úshin áleýmettik jelige «qaı jerdegi bankomat jáne qansha aqsha baryn aıtsa egesine qaıtaramyn» dep habarlama qaldyrdym. Ertesine keshke jaqyn aqsha egesi maǵan habarlasty. Men ony naqtylaı túsýge tyrystym. Qazir el ishinde alaıaqtar kóp qoı. Bankomatta ornalasqan kamerany keri aınaldyryp qaradym. Aqshany umyt qaldyrǵan adamnyń qandaı kıim kıgenin naqtylap aldym. Sol kisi eken. Umyt qaldyrǵan adam túngi aýysymnan shyqqan eken. Úıine kelgende qarjysyn qaldyryp ketkeni eske túsedi. Ózim de kópbalaly anamyn. Múmkin ol kisiniń de balalary bar shyǵar dep oıladym», - dedi Qarlyǵash.

Qarlyǵash búginde bala tárbıesimen úıde otyr. Ol osylaısha aqsha joǵaltqan adamnyń alǵysyn aldy.