Qyzylordalyq Ankarada dombyra úıretetin kýrs ashty
Erjannyń Anadoly jerine kelýi birqatar oqıǵalar sebepshi boldy. 2013-2014 jyldary ol Qyzylorda oblystyq fılarmonııasynyń atynan baýyrlas eldegi Naýryz festıvaline qatysty. Ony TÚRKSOI uıymynyń uıymdastyrǵan bolatyn. Festıval barysynda «Aqmeshit» folklorlyq ansambli quramynda óner kórsetti. Qyzylordalyq ónerpazdar týysqan eldiń birneshe belgili qalasyn aralady. Kóne zamannan kele jatqan qazaq óneri men mýzykasyn keńinen nasıhattady. Gastroldik saparda júrgen sátinde Túrkııada bilimin jetildirý týraly oılap, sol maqsatqa jetý jolynda eńbek etti. Osy maqsatta aldymen arnaıy kýrsqa qatysyp, túrik tilin meńgeredi. 2015 jyly Túrkııanyń Konıa qalasyndaǵy Nedjmettın Erbaqan ýnıversıtetiniń magıstranty atandy.
«Alǵa qoıǵan maqsatym qazaq kúılerin eýropalyq mánerde qaıta jandandyrý. Osy baǵytta baýyrlas elde úlken múmkindikter týyp tur. Túrkııadaǵy ýnıversıtet qabyrǵasynda túrli sharalarǵa qatysyp júrmin. Bul jerdegi jergilikti halyq qazaqtyń qara dombyrasyna erekshe qyzyǵýshylyq tanytatynyn baıqaımyn. Joǵary deńgeıdegi kontsertterde óner kórsettim», dedi Erjan.
Ónerpaz eki aıda sol eldegi 40 qalany aralap, qazaq ónerin kópshilikke pash etti. Atalǵan sharalardyń birine Túrkııa prezıdenti Redjep Taıyp Erdoǵannyń ózi qatysqan. Ol Erjannyń ónerine erekshe iltıpat bildirdi.
«Túrkııada «Esimsizder», «Dırenısh Qarataı» fılmderi teledıdar arqyly kópshilikke kórsetiýlde. Maǵan atalǵan fılmderge saýndtrek jazý múmkindigi týdy. Al Konıa qalasyndaǵy prodıýserlik ortalyǵymen birlesip, «Dombyra túrik rýhy» degen ataýmen qazaq tarıhı kúıleriniń digital albomyn shyǵardym. Endi qazaq kúılerin tanytý, dáripteý, nasıhattaý maqsatynda albom SD formatyn jasaý oıymda bar», dedi ol.
Erjan túrkitildes elderden oqýǵa kelgen ónerpaz stýdentterdi jınap, «Otaý» ult aspaptar ansamblin qurdy. Ankara qalasynda dombyra kýrsyn ashty. Daryndy ónerpazdyń Túrki áleminiń mýzykalyq aspaptary arqyly oryndaǵan «Adaı» kúıine túsirgen beınebaıany jýyq arada jaryqqa shyqty.
Erjan 1988 jyly dúnıege kelgen. 2003 jyly Qazanǵap atyndaǵy Qyzylorda mýzykalyq kolledjine túsip, bilimin jetildirdi. Odan ári Astana qalasyndaǵy Qazaq Ulttyq óner ýnıversıtetin úzdik aıaqtady. Alǵashqy jumysyn oblystyq fılarmonııa janynan qurylǵan «Aqmeshit» folklorlyq ansamblinde bastady. Sonymen qatar ózi tálim alǵan mýzykalyq kolledjde qyzmet atqardy.
Eske salsaq, Qazaqstanda 2018 jyldan beri shildeniń alǵashqy jeksenbisi qazaqtyń tól aspbynyń kúni retine toılanyp keledi. Sonymen qatar Túrkııada dombyra kúni atap ótildi.