Qyzylordalyq 62 túlek Reseıdiń bilim granttaryn utyp aldy
2017-2018 oqý jylynda Máskeý Ulttyq tehnologııalyq zertteý ınstıtýtyna (MISıS) - 14 túlek, K.Tımırıazev atyndaǵy Reseı memlekettik agrarlyq ýnıversıtetine - 24, Sankt-Peterbýrg memlekettik óndiristik tehnologııalar jáne dızaın ýnıversıtetine - 24 bala oqýǵa tústi. Barlyǵy 62 túlek bilim granttaryna ıe boldy. Bul týraly Qyzylorda oblysynyń ákimi Qyrymbek Kósherbaevtyń Reseı Federatsııasynyń jetekshi oqý oryndarynda oqıtyn qyzylordalyq jastarmen kezdesýinde aıtyldy.
«Aımaqqa qajetti mamandardy daıarlaý maqsatynda Syrdyń ózderińdeı talapty túlekteri Máskeý men Sankt-Peterbýrgtiń eń bedeldi joǵary oqý oryndaryna túsip, Reseı memleketiniń esebinen bilim alýda. Osy bastamanyń arqasynda úsh jyl ishinde 400-ge jýyq túlegimiz oqýǵa qabyldansa, bıyl olardyń qatary taǵy da 62 túlekpen tolyǵyp otyr. Bolashaqta osy túlekter elge oralyp, ІT, taý-ken, metallýrgııa, munaı, kúrdeli qosylymdar, qurylys, aýyl sharýashylyǵy ónimderin óńdeý, taǵy basqa salalarda aımaqta ındýstrıaldy-ınnovatsııalyq jobalardyń sátti iske asýyna, ekonomıkamyzdyń órkendeýine ózderiniń úlesin qosatyn bolady dep úmittenemiz», - dedi oblys ákimi Q. Kósherbaev.
2014 jyldan bastap qyzylordalyq 390 stýdent Reseı Federatsııasy úkimetiniń qarjysy esebinen Máskeý Ulttyq tehnologııalyq zertteý ınstıtýtynda 19 mamandyq boıynsha - 204 stýdent, K.Tımırıazev atyndaǵy Reseı memlekettik agrarlyq ýnıversıtetinde 22 mamandyq boıynsha - 98 jáne Sankt-Peterbýrg memlekettik óndiristik tehnologııalar jáne dızaın ýnıversıtetinde - 21 stýdent bilim alýda.
Aldaǵy jyly alǵashqy túlekter túlep ushady dep kútilýde. Oqý ornyn joǵary ballmen aıaqtaǵan sýtdentter «Skolkovo ǵylym jáne tehnologııalar» ınstıtýtynda "magıstratýra" baǵdarlamasyn jalǵastyrady.
Budan bólek, bıyl 10 sala boıynsha oblys ákiminiń 182 bilim granty bólindi. Aıta ketý kerek, bilim granttary áleýmettik az qamtylǵan jáne kóp balaly otbasydan shyqqan balalarǵa berilýde.
«2013 jyldan bastap oblys ákiminiń bilim granty áleýmettik az qamtylǵan jáne kóp balaly otbasydan shyqqan, ásirese aýyldyq jerlerden shyqqan balalarǵa berilýde. 2017 jylǵa deıin barlyǵy 512 túlek oblys ákiminiń bilim grantyna ıe boldy. Bıyl túrli salalar boıynsha 182 grant qostyq. Osy maqsata oblystyq bıýdjetten 101,7 mln. teńge qarjy bólindi»,- dedi oblystyq bilim basqarmasynyń basshysy Bahytjan Saılybaev.
Departamenttiń málimetterine qaraǵanda, osy jyly tehnıkalyq mamandyqtarǵa 40 grant bólinse, onyń 10-y Almaty energetıka jáne baılanys ýnıversıtetinde «Elektroenergetıka» mamandyǵy boıynsha oqıtyn bolady. AÓK salasyndaǵy mamandyqtarǵa taǵy - 20 grant bólindi. Óner salasyna - 27, al arheologııa men etnologııaǵa - 5 grant bólindi. Pedagogıkalyq kadrlar daıyndaýǵa 50 grant bólinse, taǵy 20 grant jas dárigerlerge rezıdentýrada oqý maqsatynda qaraldy. Sonymen qatar 1 grant «Jalpy tájirıbe dárigeri» mamandyǵy boıynsha M.Ospanov atyndaǵy Batys Qazaqstan memlekettik medıtsına ýnıversıtetinde oqý úshin bólindi. Sonymen birge 5 grant «Jerge ornalastyrý» mamandyǵyna, 3 grant «Aqparattyq qaýipsizdik» mamandyǵyna, al 1 grant «Jýrnalıstıka» mamandyǵyna bólindi. 2013 jyldan beri 694 bilim granty bólinip otyr.