Qyzylordadan Túrkistan oblysyna deıingi jol jabyldy

QYZYLORDA. QazAqparat - Kún raıynyń nasharlaýyna baılanysty Qyzylorda qalasynan Túrkistan oblysynyń shekarasyna deıin kóliktiń barlyq túriniń qozǵalysyna shekteý qoıyldy, dep habarlaıdy QazAqparat tilshisi.

Bul jóninde oblystyq tótenshe jaǵdaılar departamenti habarlady.

Departamentke «QazAvtoJol» AQ Qyzylorda oblysy boıynsha fılıalynan respýblıkalyq mańyzy bar avtomobıl kólik qozǵalysyna shekteý qoıý týraly habarlama kelip túsken.

«30 qarashada Astana qalasy ýaqytymen 21.40-tan bastap aýa-raıynyń nasharlaýyna baılanysty Qyzylorda qalasynan Túrkistan oblysynyń shekarasyna deıin kóliktiń barlyq túriniń qozǵalysyna shekteý qoıyldy. Bul respýblıkalyq mańyzy bar «Samara-Shymkent» avtomobıl jolynyń 1803-2057 shaqyrym aralyǵyn qamtıdy», - dep jazylǵan departament taratqan habarlamada.

Vedomstvo málimetinshe, atalǵan aýmaqta aýa temperatýrasynyń tómen jaǵdaıynda qar aralas jańbyr jaýýda, kóktaıǵaq bolyp tur.

Eske salsaq, budan buryn Qyzylordadaǵy 5 qabatty turǵyn úıdiń shatyryn jel ushyryp ketti.