Qyzylordada jyraýlyq mektep shákirtteriniń kontserti ótti

QYZYLORDA. QazAqparat - Qyzylordada kórermender Syr boıyndaǵy jyraýlyq mektep shákirtteriniń ónerlerin tamashalady, dep habarlaıdy QazAqparat tilshisi.

Oblystyq mádenıet, arhıvter jáne qujattama basqarmasynyń uıymdastyrýymen A.Toqmaǵanbetov atyndaǵy mádenıet úıinde «Kerýen jyrdyń jalǵasy» atty kontsert qoıyldy. Aıta keterligi, bul shara bıyl alǵash ret ótkizilip otyr

Syr boıy jyraýlyq óneriniń ózindik órnegi bar. Olardyń ózinde bir-birine uqsaı bermeıtin ózgeshelik kezdesedi. Qazirgi tańda oblys aýdandarynda sondaı jyraýlyq mektepteri órenderdi ónerge baýlyp keledi. Atap aıtqanda, Qarmaqshy aýdanyndaǵy Kósheneı Rústembekov atyndaǵy jyraýlar úıi men Turymbet Salqymbaıuly atyndaǵy áýez mektebiniń, Qazaly aýdanyndaǵy Baınazar Ótepov atyndaǵy jyr úıirmeleriniń, Aral aýdandyq mádenıet ortalyǵynyń jáne Shıeli aýdanyndaǵy Nartaı jyr mektebiniń jáne Qyzylorda qalasyndaǵy jyr úıirmeleriniń shákirtteri atalmysh shara barysynda óz tartýyn jasady.

Jas jyraýlar ónerin baǵalaýǵa osy salada uzaq jyldan beri jemisti qyzmet etip kele jatqan Jumabek Aqqulov, Arnur Kósheneı, Berik Saımaǵanbetov, Sholpan Bıimbetova, Aqmaral Noǵaıbaeva syndy mamandar qatysty.

«Atalmysh jyr keshi arqyly jas urpaq boıynda ulttyq ónerge degen qyzyǵýshylyqty arttyrýǵa mán berdik. Búgingi shara barysynda órenderdiń óreli ónerge degen umtylysy bizdi qýantty», - dedi Kósheneı Rústembekovtiń balasy, jyraý Arnur Kósheneı.

Byltyr aýdandardaǵy óner mektepterinde qobyz úıirmeleri ashyldy. Endi oǵan áýes órenderdiń qatary kóbeı túspek.