Qyzylordada jyl basynan beri 47 adam jol apatynan kóz jumdy

QYZYLORDA. QazAqparat - Qyzylorda oblysynda bıylǵy jyldyń 5 aıynda oblysta 155 jol-kólik oqıǵasynda 47 adam kóz jumyp, 196 adam dene jaraqatyn aldy, dep habarlaıdy QazAqparat tilshisi.

Bul ótken jylǵy jol-kólik oqıǵasynan 12% (138-den 155-ke) kóbeıgenin kórsetedi. Saldarynan qaıtys bolǵandar - 68% (28-den 47-ge), jaraqat alǵandar - 12% (175-ten 196-ǵa) artqan.

«Jol-kólik oqıǵasynyń basty sebebi - júrgizýshiler men jaıaý júrginshiler jol erejesin saqtamaıdy. Mundaı oqıǵalar negizinen jyldamdyqty shamadan tys asyrýdan, joldyń qarsy baǵytyna shyǵýdan, jaıaý júrginshiler ótkelinde olarǵa basymdyq bermeý jáne manevr erejesin buzý saldarynan bolyp otyr. Jyl basynan beri qalada ornatylǵan avtomattandyrylǵan júıeler arqyly jyldamdyqty asyrýdyń 9 890 deregi anyqtaldy. Oblys ortalyǵynda júrgizýshiler tarapynan jyldamdyqty shamadan tys asyrý deregi azaımaýda. Osy sebepti qala ortalyǵynda bolǵan 69 jol-kólik oqıǵasynda 8 adam kóz jumyp, 73-i dene jaraqatyn aldy», - dedi oblystyq polıtsııa departamenti bastyǵynyń birinshi orynbasary Shamshıdın Ámıtov.

Aıta keteıik, Qyzylordada alaıaqtyq qylmysynyń basym bóligi ınternet arqyly jasalǵan.