Qyzylordada jyl basynan beri 35 márte azyq-túlik jármeńkesi ótkizildi
Oblys ákimi Gúlshara Ábdiqalyqovanyń tóraǵalyǵymen áleýmettik mańyzy bar azyq-túlik pen azyq-túlik emes taýarlardyń baǵasyn turaqtandyrý boıynsha keńeıtilgen otyrys ótti. Jıynǵa oblys ákiminiń orynbasarlary, tıisti salalyq basqarma men departament basshylary, onlaın rejımde qala jáne aýdan ákimderi qatysty.
Kún tártibinde oblystaǵy tutyný baǵasynyń ındeksi, áleýmettik mańyzy bar azyq-túlik pen azyq-túlik emes taýarlardyń baǵalaryn ustap turýǵa baǵyttalǵan sharalardy saralaý máseleleri qaraldy.
Oblys boıynsha statıstıka departamentiniń basshysy Márııam Baekeevatiń aıtýynsha, óńirde tutyný baǵalarynyń ındeksi ótken jyldyń osy kezeńimen salystyrǵanda 106,8% qurady. Azyq-túlik taýarlaryna baǵalar - 8,3%, azyq-túlik emes taýarlaryna - 6,7%, halyqqa arnalǵan aqyly kórsetiletin qyzmetter - 4,9%-ǵa ósken.
Al oblystyq aýyl sharýashylyǵy basqarmasynyń basshysy Talǵat Dúısebaev aımaqta baǵanyń negizsiz ósýine jol bermeý úshin oblystyń turaqtandyrý qorynan taýarlyq ınterventsııalar júrgizý mehanızmi qolǵa alynǵanyn atap ótti. Nátıjesinde turaqtandyrý qorynda 189,1 mln teńgeniń 1161,4 tonna taýary saqtalyp otyr. Al 19 áleýmettik mańyzy bar ónimderi boıynsha úsh aılyq qajettilik 68,3 myń tonnany qurasa, onyń jetkizilýi 59,2 myń tonnany shamalady. Osy qajetti ónim kólemin oblys boıynsha qamtamasyz etý úshin «Baıqońyr» ÁKK» AQ arqyly 1685,4 tonna áleýmettik mańyzy bar ónimderdi jetkizý boıynsha kelisim alynsa, 1900 tonna ónimdi memlekettik satyp alý arqyly júrgizý josparlandy.
Óńirde azyq-túlik baǵalaryna degen qoljetimdilikti arttyrý úshin jármeńkeler uıymdastyrý qolǵa alyndy. Jyl basynan beri turǵyndar úshin turaqty túrde 35 ret aýyl sharýashylyǵy jármeńkesi ótkizildi.
Jıyn barysynda oblys ákimi azyq-túlik baǵasynyń ósýi halyqty alańdatyp otyrǵan ózekti másele ekenin nazarǵa salyp, qala jáne aýdan ákimderine nannyń ortasha baǵasyn 90 teńgeden asyrmaý qajet ekenin qaperge saldy.
«Qazirgi ýaqytta halyqty óte alańdatyp otyrǵan ózekti másele – azyq-túlik baǵasynyń ósýi. Jyl bolsa aıaqtalyp qaldy, jeltoqsan aıyndaǵy merekeler qarsańynda ádettegideı saýda-sattyq kólemi ulǵaıyp, ásirese azyq-túlik baǵalarynyń ósý qaýpi bolady. Sondyqtan osy máselelerdiń aldyn-alý sharalaryn qarastyrýymyz qajet», - dedi oblys ákimi Gúlshara Ábdiqalyqova.
Jıynda qaralǵan úshinshi másele boıynsha oblystyq kásipkerlik jáne týrızm basqarmasynyń basshysy Ferdoýsı Qojabergenov azyq-túlik emes taýarlarynyń baǵasyna qatysty negizgi kórsetkishterdi tizbeledi.
Bıyl azyq-túlik emes taýarlardyń baǵasy ótken jyldyń esepti kezeńimen salystyrǵanda 6,7 paıyzǵa ósti. Turmystyq, qurylys taýarlaryna qaraǵanda ósim janar-jaǵarmaı baǵasynda baıqalýda.
Aımaq basshysy azyq-túlik emes taýarlardyń baǵalary da jalpy ınflıatsııaǵa úlken áserin etetinin atap ótti. Máselen, ótken jylǵy pandemııa kezindegi karantındik sharalar ýaqytsha saýda-ekonomıkalyq baılanystardyń úzilýine ákelip, taýar, shıkizattardyń tapshylyǵynyń saldarynan respýblıkalyq naryqta negizsiz baǵa kóterilýine ákeldi. Ásirese, janar-jaǵarmaı baǵasynyń ósýi men tapshylyǵyna baılanysty halyq arasynda shaǵym aıtýshylar kóp. Osy rette aımaq basshysy energetıka basqarmasynyń basshysyna basty ózgeristerge saı turǵyndarǵa qajetti túsindirý jumystaryn kúsheıtý qajet ekendigin tapsyrdy.